Եթե պաշտոնական հաղորդագրություն եք կարդում, որ մեր մայրաքաղաքում որեւէ միջոցառում է նախատեսվում անցկացնել, ընդ որում, պաշտոնապես հորդորում են հյուրեր, զբոսաշրջիկներ հրավիրել այդ միջոցառումներին մասնակցելու, ապա ամեն օր, նույնիսկ լավ կլինի ամեն ժամ մի քանի աղբյուրից ճշտեք հայտարարության իսկությունը: Թե չէ կարող է պատահել, որ ձեր հյուրերը հեռավոր մի երկրից հազարավոր կիլոմետրեր կտրեն, մեծ գումարներ ծախսեն, գան Երեւան ու նրանց խոստացած փառատոնը չկայանա: Այդպես հիասթափվեցին մի խումբ ճապոնացիներ:
Երեւանի քաղաքապետարանը «Երեւանյան ամառ» միջոցառումների օրացույցը նախապես տեղադրում է իր պաշտոնական կայքում, այդ միջոցառումների ցանկում նախատեսված էր օգոստոսի 2-ին ժամը 18.00-21.00-ն «Երեւան ՏԱՐԱԶֆեստ»-ը, որը պիտի տեղի ունենար, ըստ քաղաքապետարանի հայտարարության, Հյուսիսային պողոտայում:
Այս հայտարարությունը դեռ հունիսի 4-ին Երեւանի տուրիզմի բաժնի պետ Մարիա Բարաղամյանն էլ, ինչպես մյուս բոլոր միջոցառումները՝ ասենք քաղաքապետի այցը որեւէ երկիր, կամ քաղաքապետի մասնակցությունը որեւէ միջոցառման, տեղադրել է ֆեյսբուքյան իր էջում՝ քաղաքապետարանի կայքէջի հիպերհղումով: «Երեւանյան ամառն» իր միջոցառումներով բավականին ակտիվ գովազդվել է ոչ միայն ֆեյսբուք սոցցանցով, այլեւ տարբեր լրատվամիջոցներով, ուստի զբոսաշրջային ընկերությունները կասկած չեն ունեցել, որ որեւէ միջոցառում չի կայանա, կամ կհետաձգվի:
«Էյբիք» տուրօպերատորի գլխավոր տնօրեն Վարդիթեր Հարությունյանն էլ վստահելով Երեւանի քաղաքապետարանի պաշտոնական հաղորդագրությանը 10 հոգանոց ճապոնացի զբոսաշրջիկների խումբ է հրավիրել Երեւան հենց «ՏԱՐԱԶֆեստին» մասնակցելու համար, ճապոնացիները վաղուց էին ցանկություն հայտնել մասնակցել:
Կարդացեք նաև
Aravot.am-ի հետ զրույցում Վարդիթեր Հարությունյանն ասաց, որ ինքը Ճապոնիայում ամեն տարի մասնակցում է տուրիստական ցուցահանդեսներին ու միշտ հայկական տարազով է լինում, սա գրավել է ճապոնացիների հետաքրքրությունը եւ Վարդիթերին խնդրել էին, որ եթե հայկական տարազաների մասին միջոցառում լինի, անպայման իրենց տեղյակ պահվի: Տուրօպերատորի ղեկավարն էլ հույսը դնելով քաղաքապետարանի հայտարարության վրա, ճապոնացի զբոսաշրջիկներին հրավիրել է Երեւան՝ օգոստոսի 2-ին «Երեւան ՏԱՐԱԶֆեստին» մասնակցելու, ու չնայած ճապոնացիները խուսափում են Հայաստան գալ օգոստոս ամսին՝ շոգերի պատճառով, բայց հանուն հայկական տարազների 10 ճապոնացի շոգն էլ հաշվի չառան: Ընդ որում, նման հրավերներն էլ գոնե մեկ ամիս առաջ են անում, որպեսզի զբոսաշրջիկները պատրաստվեն: Օգոստոսի 2-ին Վարդիթեր Հարությունյանը ճապոնացի տուրիստների հետ այցելել են Հյուսիսային պողոտա, բայց հիասթափվել, որեւէ փառատոն, կամ գոնե «թեթեւ» միջոցառում հայկական տարազների մասին չի եղել:
«Որքան էլ շրջեցինք այդ տարածքով, հետո Կարապի լճի մոտակայքում, ոչ մի տեղ միջոցառում չկար: Փորձեցի զանգել Տերյան մշակութային կենտրոն, տարազների ցուցադրմանն իրենք էլ էին մասնակցելու, անպատասխան մնացին զանգերս: Կարճ ասած՝ հիասթափվեցին զբոսաշրջիկները, բայց ես չասացի, որ քաղաքապետարանը խոստացել է ու չի արել, դա երկրի իմիջի հարց է, ես ասացի, որ գուցե ես օրն եմ շփոթել: Բայց ճապոնացիների հետաքրքրությունը մեր տարազների մասին այլ կերպ բավարարեցի, գնացինք պատմության թանգարան, այնտեղ իրենց ամեն ինչ մանրամասն ներկայացվեց, իրենք տարազներով նկարվեցին, այնպես որ ինչ-որ առումով բացը լրացրեցի»,-մեզ հետ զրույցում պատմեց Հարությունյանը:
Նրա խոսքերով՝ «Եթե պիտի քաղաքապետարանը չեղյալ աներ այս միջոցառումը, ապա գոնե նախապես հայտարարեր այդ մասին, ես էլ մեր տուրիստներին Գեղարքունիքի մարզ կտանեի,այնտեղ հուլիսի վերջին տարազների մասին շատ լավ միջոցառում է եղել»:
Երեւանի քաղաքապետարանի կայքում չկա որեւէ հայտարարություն, թե ինչու չի կայացել նախապես հայտարարված միջոցառումը, հավանաբար մտածել են՝ միեւնույն է, եկող չի լինի: Իսկ օգոստոսի 2-ի «Երեւան ՏԱՐԱԶֆեստի» մասին տեղեկատվությունը դեռ պահպանվում է: Ապացույցը՝ լուսանկարը:
Նելլի ԲԱԲԱՅԱՆ
