Այն կկազմվի գալիք 10 տարիների համար
Այս տարի ավարտվում է Կրթության զարգացման պետական նախորդ ծրագրի ժամկետը: Ինչպես Aravot.am-ի հետ զրույցում նշեց Կրթական տեխնոլոգիաների ազգային կենտրոնի (ԿՏԱԿ) տնօրեն Արտակ Պողոսյանը, նախատեսվում է կազմել Կրթության զարգացման պետական հաջորդ ծրագիրը՝ 10 տարի ժամկետով, այսինքն՝ 2016- 25 թթ համար: «Կրթության պետական զարգացման ծրագիրը կրթության քաղաքականության հիմնական փաստաթուղթն է, որից բխելու են մնացյալ ենթածրագրերը: Կրթության քաղաքականությունը պայմանավորված է լինելու այս հենց ծրագրով եւ ծրագրի մշակման նպատակով, որպեսզի ավելի արդյունավետ լինի ուսումնասիրությունը, բացահայտվեն բոլոր առկա խնդիրները եւ նախանշվեն նպատակները, փորձ է արվել կազմակերպել ֆոկուսային քննարկումներ՝ լրագրողների, բուհական մասնագետների, երիտասարդ գիտնականների, դպրոցների, քոլեջների, մանկապարտեզների ղեկավարների հետ: Կազմակերպվելու են նաեւ փորձագիտական հարցումներ, այսինքն՝ խորը հարցազրույցներ՝ պատկերացնելու համար դաշտի խնդիրները»,-ասաց պարոն Պողոսյանը:
Օգոստոսի 4-ին լրագրողների հետ ԿՏԱԿ-ում կայացած հանդիպումը հենց այս համատեքստում էր:
Արտակ Պողոսյանից հետաքրքրվեցինք՝ իր կարծիքով որո՞նք են կրթության ոլորտի 5 թերացումները կամ խնդիրները եւ 5 ձեռքբերումները: « Քանի որ վերլուծությունը դեռեւս ամփոփված չէ, այս պահին չեմ կարող գնահատել, գնահատականը ինքներդ կտեսնեք Կրթության զարգացման նոր ծրագրի նախաբանում, որտեղ նախանշված կլինեն թե նախորդ 5 տարիների ընթացում կրթության ոլորտում ինչ ձեռքբերումներ են եղել եւ գալիք մարտահրավերները: Նախագիծը պատրաստ լինելուց հետո եւս նախատեսվում է հանդիպում լրագրողների հետ. կլինի առանձին քննարկում՝ մոտ 60 հոգանոց կազմով, դիտողությունները հաշվի կառնվեն եւ կներառվեն զարգացման ծրագրում: Հաշվի են առնվելու հետեւյալ չափանիշները՝ կրթության մատչելիություն, որակ, արդյունավետություն, կառավարման խնդիրներ, եւ կարմիր գծի պես շեշտադրվելու են մարդու, երեխայի, կրթության առանձնահատուկ կարիք ունեցող անձանց իրավունքներն ու, պաշտպանությունը: Մի խոսքով հետազոտությունը ոլորտային եւ միջոլորտային է լինելու»,-ասաց ԿՏԱԿ-ի տնօրենը:
Կարդացեք նաև
Գոհար ՀԱԿՈԲՅԱՆ
Լուսանկարը՝ Արտակ Պողոսյանի ֆեյսբուքյան էջից:
