Լրահոս
Օրվա լրահոսը

«Հայկական սպորտը և մարմնակրթությունը Օսմանյան կայսրությունում»

Օգոստոս 04,2015 16:36

Հայոց ցեղասպանության թանգարան-ինստիտուտը վերահրատարակել է Հայկ Դեմոյանի «Հայկական սպորտը և մարմնակրթությունը Օսմանյան կայսրությունում» պատկերազարդ մենագրությունը: Այն 2009 թ. հրատարակության լրամշակված ու նորահայտ նյութերով հարստացված տարբերակն է, որը Հայոց ցեղասպանության թանգարան-ինստիտուտի ժամանակավոր ցուցադրությունների սրահում այսօր ներկայացվեց հանրությանը:

Գրքում առաջին անգամ ներկայացվում են Օսմանյան կայսրությունում հայկական սպորտի և մարմնակրթության ձևավորման նախապատմությունը, արևմտահայության շրջանում մարմնամարզության և սպորտի զարգացման ընթացքն ու առաջին հայ մարմնամարզական ակումբների գործունեությունը: Այսպիսով՝ լուսանկարչական նյութով հարուստ այս հրատարակությամբ ընթերցողին են ներկայացվում հայկական սպորտի պատմության մինչ օրս անհայտ, սակայն չափազանց հետաքրքիր դրվագներ:

«Հայկական սպորտը և մարմնակրթությունը Օսմանյան կայսրությունում» մենագրության շնորհանդեսի հետ մեկտեղ՝ տեղի ունեցավ նաև համանուն ժամանակավոր ցուցադրության բացումը: Ներկայացված են բացառիկ նյութեր ու լուսանկարներ: Ցուցադրությունը բաղկացած է 12 խորագրից՝ ներառելով 600 լուսանկար, որոնք վերաբերում են 1900­-1923 թթ. մարմնակրթական շարժմանն Օսմանյան կայսրությունում:

Հայկ Դեմոյանը նշեց, որ իրենց ուշադրությունն այս թեմայի վրա բևեռել է պատահականությունը, երբ անվանի մարզիկ ու լուսանկարիչ Գրիգոր Ճոլոլյանի որդի Պատրիս Ճոլոլյանը որոշել է ունեցած բոլոր լուսանկարներն ու նյութերը նվիրաբերել Հայոց ցեղասպանության թանգարան-ինստիտուտին:

«Ես որոշեցի հորս ողջ հավաքածուն նվիրել Հայոց ցեղասպանության թանգարանին, որպեսզի ապագա սերունդներն իմանան, թե ինչպիսին է եղել իրենց նախնիների կյանքը և ինչպես են նրանք ապրել Օսմանյան կայսրությունում»,- ասաց Պատրիս Ճոլոլյանը:

Հավելենք, որ ցուցահանդեսը բաց կլինի մինչև հոկտեմբերի 1-ը:

 

Սիրանուշ ՀԱՅՐԱՊԵՏՅԱՆ

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Օգոստոս 2015
Երկ Երե Չոր Հնգ Ուրբ Շաբ Կիր
« Հուլ   Սեպ »
 12
3456789
10111213141516
17181920212223
24252627282930
31