Aravot.am-ի հետ զրույցում գյումրեցի ազատամարտիկ, ՀԱԿ կառույցի անդամ Գեւորգ Ալիխանյանը, անդրադառնալով սահմանդրական փոփոխություններին, կարծիք հայտնեց, որ Հայաստանում փորձում են վերադարձնել բոլշեւիկյան միակուսակցական համակարգը:
«Սա ավելի վատ Սահմանադրություն է, քան Սովետական Միությանն էր, քանի որ այստեղ կետեր կան, որտեղ հանցագործին սահմանադրորեն թույլ են տալիս մարդ սպանելու: Սովետական Միության Սահմանադրության մեջ էլ գրված է՝ մարդը ապրելու իրավունք ունի, առանձին կետով էլ գրված էր՝ մարդն աշխատելու իրավունք ունի: Մեր ներկայիս Սահմանադրության մեջ էլ է դա ամրագրված. մարդն ապրելու իրավունք ունի եւ առանձին կետով գրված է՝ մարդն աշխատելու իրավուքն ունի: Էս փոփոխված նախագծի մեջ մարդը իրավունք ունի, եւ մի բայց է մտցված՝ եթե բացառիկ անհրաժեշտություն չկա նրան կյանքից զրկելու: Ներողություն, եթե այդ բացառիկ անհրաժեշտությունն ընդունենք կա, ինչո՞ւ չեք շեշտում էդ անհրաժեշտությունը ո՞րն է, եթե դա շեշտում եք, Սահմանադրությամբ շեշտեք»,- ասում է Գեւորգ Ալիխանյանը:
Նա չի հավատում Սերժ Սարգսյանի վստահեցումներին, որ ինքը ղեկավար պաշտոն զբաղեցնելու ցանկություն չունի: «Սերժ Սարգսյանն ասում է՝ ինձ պաշտոն պետք չէ, ես չեմ ուզում պաշտոն, ժողովուրդ ջան, հավատացեք ինձ եւ այլն, ե այլն: Բնական է, ինքը պաշտոն չի ուզում, ինքը կմնա ՀՀԿ-ի գլխավոր քարտուղար, բոլորին կնշանակի, ինքը ոչնչի համար պատասխան չի տա, բայց բոլոր կենթարկվեն իրեն, ինչպես Ստալինն էր անում, ինչպես Կոմկուսի յուրաքանչյուր գլխավոր քարտուղար, Ստալինից սկսած՝ Գորբաչովով վերջացրած: Էս ո՞ւր ենք գնում, բոլշեւի՞զմ… Տեսեք ՀՀԿ-ի պատգամավորների, նախարարների կազմը, մարդիկ են, որոնք 91 թվականի անկախությանը դեմ են քվեարկել հիմանական մասը, նախկին կոմսոմոլներ, մի մասը՝ մաֆիոզներ, էն մի մասն էլ երիտասարդ ՀՀԿ-ականներ, ուղղակի իրենց հետաքրքրում է իրենց կարիերիան, ուրիշ ոչ մի բան, նույն կոմսոմոլական ոճով: Հիմա Սերժ Սարգսյանը ուզում է, որպեսզի մենք դառնանք մի հատ խանական երկիր, որովհետեւ Սովետական Միությունում, այնուամենայնիվ, մարդն արժեք ուներ, կար դպրոց: Էդ դպրոցն էլ պղծեցին սրանք, ավիրեցին, հիմա ինչ են ասում՝ նոր նախագծով 10-ամյա դպրոց պետք է լինի: Հարց է ծագում ՝ էդ եվրոպական դոլարները կամ եվրոները քա՞ղցր էին, առաք, կերաք, 12-ամյա դարձրեցիք, ավիրեցիք էդ ամեն ինչը, հիմա էլ ասում եք 10-ամյա՞… Սերժ Սարգսյանը հիմնվում է Վենետիկի հանձնաժողովի վրա, Վենետիկի հանձնաժողովը հստակ հայտարարությամբ հանդես եկավ, բայց Սահմանադրության նախագիծ գրողներից մեկը, ազգանունը չեմ հիշում, հայտարարություն արեց, թե Վենետիկի հանձնաժողովը մեզ ի՞նչ…Ես չեմ հասկանում, էդ ո՞վ է հրաման տվել էդ հայեցակարգը ստորագրելու. Սերժ Սարգսյանը հայտարարում է՝ ես չեմ ուզում էս նախագիծը, հիմնվում է Վենետիկի հանձնաժողովի վրա, բայց այս հանձնաժողովին, եվրոպացիներին միեւնույնն է, թե Հայաստանը ինչ Սահմանդրություն կունենա: Նրանց կարեւոր է՝ Հայաստանում ժողովրդավարություն լինի ռեալ, այսինքն եվրոպացիներն էլ շահագրգռություն չունեն, Եվրասիական տնտեսական միությունն ընդհանրապես դեմ է, բա ո՞վ է գլուխգործոցը: Ոչ մեկը չի հարցնում, թե երկրի առաջին դեմք կոչեցյալ, բա ո՞վ է քեզ հրաման տվել, որ էս նախագիծը անես, եթե դու չես ուզում: Այսինքն մեծագույն բլեֆ է»:
Ըստ մեր զրուցակցի, քանիի դեռ ժողովուրդը ոտքի է ելնում, զբաղված է հոսանքի թանկացման, Նաիրիտի հետ կապված հարցերի շուրջ բողոքներ ներկայացնելով, իրենք փորձում են անցկացնել հանրաքվեն: Ըստ նրա, գործը չպիտի հասնի հանրաքվեին, պիտի պայքարել: Այլապես իշխանությունները կփորձեն այն մի կերպ հասցնել հանրաքվեի ու իշխանական պետական ռեսուրսը օգտագործելով՝ ոստիկանության, քաղաքապետարանի, դպրոցների աշխատակիցներին ճիպոտահարելով, ահաբեկելով , թե աշխատանքից կհեռացնեն, կտանեն ընտրության:
Կարդացեք նաև
Ըստ Գեւորգ Ալիխանյանի, ժողովուրդը չի վստահում իշխանություններն, եւ ճիշտ է անում, քանի որ առ այսօր իշխանությունը չի բացահայտում մարտիմեկյան 10 սպանությունների գործը, համարում է հարցը փակված: «Ես ապշում եմ, թե այդ մարդասպան իշխանությունների հետո ինչպե՞ս կարող են որոշ կուսակցություններ քննարկման գնալ: Ի՞նչ լավ բան կարող է առաջարկել, եթե ոչ անձնական կամ նեղկուսակցական. արի՛, ինձ հետ կոալիցիա կազմի, քեզ մի երկու նախարարական պորտֆել կտամ, հա՞»: Ըստ Գեւորգ Ալիխանյանի, եթե հանկարծ, Աստված մի արասցե, սահմանադրական փոփոխություններ եղան, հնարավոր չէ ասել, թե Հայաստանի հետ ինչ կկատարվի:
Նունե ԱՐԵՎՇԱՏՅԱՆ
