Թուրքիան կպահանջի երկու նախկին դատախազների արտահանձնումը Գերմանիայից: Այս հայտարարությունը, ըստ «Turkish Weekly»-ի, երեկ արել է Ռեջեփ Թայիփ Էրդողանը:
Հիշեցնենք, որ Թուրքիան պնդում է, թե պաշտոնանկ արված դատախազներ Զեքերյա Օզը եւ Ջելալ Քարան Վրաստանի տարածքով փախել էին Հայաստան: Երեկ էլ թուրքական մամուլը հաղորդեց, որ նախկին դատախազները Հայաստանից մեկնել են Գերմանիա:
«Ես հավատում եմ, որ ամենայն հավանականությամբ նրանց նկատմամբ կարմիր ծանուցում կթողարկվի»,- ասել է Էրդողանը եւ հավելել, որ դատախազների նկատմամբ Ինտերպոլի միջոցով ձերբակալման պահանջ է տարածվել:
Սեւ ծովի մոտ գտնվող Ռիզ քաղաքում քաղաքացիական հասարակության ներկայացուցիչներին դիմելիս Էրդողանը նշել է, թե Գերմանիան հետագայում խնդիրներ կունենա Թուրքիայից կասկածյալներին արտահանձնելու գործում, եթե Օզը եւ Քարան չվերադարձվեն:
Կարդացեք նաև
«Մենք հիմա կտեսնենք, թե ինչ կանի Գերմանիան: Գերմանիան չի կարողանա կասկածյալների արտահանձնում պահանջել հետագայում, եթե այդպես չվարվի այս դեպքում»,- ավելացրել է Էրդողանը:
Պատրաստեց Աշոտ ԻՍՐԱԵԼՅԱՆԸ
