ԱԺ ՀՀԿ խմբակցության պատգամավորներն այս օրերին իրենց առաջարկություններն են ներկայացնում սահմանադրական բարեփոխումների հանձնաժողովին: Aravot.am-ի զրույցում ՀՀԿ խմբակցության պատգամավոր Խոսրով Հարությունյանն ասաց, որ իր ներկայացրած առաջարկությունները ոչ թե սահմանադրության նախագծի այս կամ այն դրույթը մերժելուն են ուղղված, այլ սահմանադրական նորմի իրավական որոշակիությունը երաշխավորող առաջարկներ են:
Պարոն Հարությունյանը հավաստիացրեց. «Եթե սահմանադրության այս նախագիծն այս տեքստով էլ դրվեր հանրաքվեի, ես կողմ կքվեարկեի»:
Խորով Հարությունյանի առաջարկներից մեկը վերաբերում է հանրային իշխանության պատասխանատվությանը. «Հանրային իշխանությունը պատասխանատվություն է, այլ ոչ միայն իրավունք: Կամ ամրագրված է, որ արժանապատվությունը մարդու ու քաղաքացու հիմնարար ազատությունների հիմքն է, ես ասում եմ, որ այդ իրավունքը ոչ միայն հանդիսանում է այդ իրավունքի հիմքը, այլև աղբյուրը»: Խոսրով Հարությունյանի կարծիքով՝ սահմանադրությամբ պետք է ամրագրվի նաև գործարարությամբ զբաղվելու ազատ ընտրությունը:
Կառավարության գործունեության և կառուցվածքի հետ կապված ևս առաջարկություններ կան: Խոսրով Հարությունյանը մանրամասնեց. «Սահմանադրությունն ամրագրում է, որ կառավարության և′ կառուցվածքը, և′ գործունեությունը պետք է սահմանվի օրենքով: Բայց ես կարծում եմ, որ կառուցվածքը չպետք է սահմանվի օրենքով: Օրինակ՝ վարչապետը հրաժարական է տալիս, գալիս է նորը, նրա պատկերացմամբ ենթադրենք անհրաժեշտ է ոչ թե էկոնոմիկայի նախարարություն, այլ առևտրի և արդյունաբերության: Բայց եթե կառուցվածքը սահմանվում է օրենքով, ապա վարչապետը զրկվում է իր համար ցանկալի կառավարություն ձևավորելու պատասխանատվությունից: Փոխարենը կառավարության գործունեության կարգը,
Կարդացեք նաև
ՀՀ նախագահի և ԱԺ-ի հետ հաղորդակցությունը, պետք է կարգավորվի օրենքով»: Վարչապետին անվստահություն հայտնելու ինստիտուտի վերաբերյալ ամրագրումներում ևս պարոն Հարությունյանը որոշ փոփոխությունների անհրաժեշտություն է տեսնում:
Նա որոշակիացրեց. «Ըստ գործող նախագծի՝ պատգամավորների ցանկացած մեկ երրորդ կարող է հանդես գալ վարչապետին անվստահություն հայտնելու առաջարկով. «Ենթադրենք առաջին անգամ դա չի հաջողվում, բայց ԱԺ-ն ցանկացած վեց ամիսը մեկ կարող է այն ներկայացնել: Պատկերացնում եք, որ կառավարությունը կարող է վեց ամիսը մեկ անվստահության ճնշման տակ հայտնվել»: Խոսրով Հարությունյանը առաջարկում է այս դրույթը փոփոխել այնպես, համաձայն որի՝ կառավարության անվստահության հարցը առաջին մեկ տարվա ընթացքում չի կարող դրվել, դրանից հետո ոչ ավել, քան տարին մեկ անգամ կարող է դրվել»:
Տաթև ՀԱՐՈՒԹՅՈՒՆՅԱՆ
