Հանրահայտ իռլանդացի դերասան եւ պրոդյուսեր Փիրս Բրոսնանը, որ կատարել է Ջեյմս Բոնդի դերը 4 ֆիլմերում («Ոսկե աչք», «Վաղը երբեք չի մեռնում», «Ամբողջ աշխարհը քիչ է», «Մեռիր, բայց ոչ հիմա»), վերջերս տղամարդկանց Details ամսագրին տված հարցազրույցում կարծիք է հայտնել, որ եկել է ժամանակը, որպեսզի Ջեյմս Բոնդին, այսինքն՝ Գործակալ-007-ին մարմնավորի որեւէ միասեռական կամ սեւամորթ: «Այդպես ավելի հետաքրքիր կլինի»,- նշել է նախկին «Բոնդը»: Միեւնույն ժամանակ նաեւ տարակուսանք է հայտնել՝ ֆիլմի որեւէ ռեժիսոր դժվար թե համարձակվի նման քայլի գնալ:
Փիրս Բրոսնանի համոզմամբ, 21-րդ դարի Ջեյմս Բոնդի կերպարում հրաշալի կնայվի մասնավորապես բրիտանացի սեւամորթ դերասան եւ պրոդյուսեր Իդրիս Էլբան, որը, նրա համոզմամբ, եւ խարիզմա ունի, եւ հմայք: Իմիջիայլոց, Իդրիս Էլբայի անունը՝ իբրեւ պոտենցիալ Ջեյմս Բոնդ, շրջանառության մեջ է դրվել այն բանից հետո, երբ Դենիել Քրեյգը հրաժեշտ է տվել այդ կերպարին: Այսինքն՝ դա 2014-ի վերջերին էր: Ընդ որում, լուրը տարածվեց այն բանից հետո, երբ հաքերային հարձակման արդյունքում Sony Pictures Entertainment-ի գաղտնի նամակագրությունը հանրայնացվեց:
Հավելենք, որ Էլբայի անունը հռչակվել է հատկապես RocknRolla, Prometheus, Pacific Rim ֆիլմերով:
«Առավոտ» օրաթերթ
28.08..2015
