Լրահոս
Օրվա լրահոսը

15-ամյա  ամուսնացած աղջիկներին ինչպե՞ս են պարտադրելու  12-ամյա կրթություն

Օգոստոս 29,2015 15:42

Կառավարության նախաձեռնությամբ  ՀՀ Ազգային ժողովն օրենք է ընդունել, որով 2017թ.-ից Հայաստանում 12-ամյա կրթությունը պարտադիր է  դառնալու: 9-րդ դասարանն ավարտելուց  հետո դպրոցականները պարտադիր պետք է ուսումը շարունակեն դպրոցներում, բուհերում կամ քոլեջներում, ուսումնարաններում: Այդ մասին օգոստոսի 24-ին Տավուշի մարզպետարանում կայացած խորհրդակցության ժամանակ հայտարարեց գիտության եւ կրթության նախարար Արմեն Աշոտյանը:

Նա  ասաց , որ ամեն տարի 9-րդ դասարանն ավարտելուց հետո 3000-4000  աշակերտներ ուսումը չեն շարունակում,  «նրանք՝ ունենալով  կրթական ցածր շեմ, հետո, իրենց կյանքի ընթացքում, ավելի մեծ հավանականությամբ, դատապարտվում են աղքատության, ավելի ցածր վարձատրվող աշխատանքի: Եվ իհարկե ունենում ենք նաեւ  սոցիալիզացիայի պրոբլեմներ, հակասոցիալական դրսեւորումներ: Մեր ոստիկանության վիճակագրությունը ցույց է տալիս, որ այն երեխաների մոտ, ովքեր 9-րդ դասարանից հետո կրթությունը չեն շարունակել, օրինախախտումների ցուցանիշները մի քանի անգամ, եթե ոչ մի քանի տասնյակ անգամ, բարձր են, քան ուսումնական հաստատություններում սովորողների մոտ»:

Աշոտյանը հայտարարեց, որ պարտադիր 12-ամյա կրթությամբ իրենք «պարտադրում են ավելի լավ ապագայի հույս»:

Հավելենք, որ Տավուշի մարզում քիչ չեն աղջիկները, որոնք 15-16 տարեկանում ամուսնանում, մայրանում, ուսումը կիսատ են թողնում; Սահմանամերձ մարզում բազմաթիվ են  նաեւ ծնողազուրկ, բազմանդամ ընտանիքների  երեխաները, որոնք ստիպված ուսումը կիսատ են թողնում, որպեսզի աշխատեն, հոգան կարիքավոր ընտանիքի հոգսերը:  Նախարարն իր ելույթում  պարտադիր 12-ամյա կրթության այդ խնդիրներին չանդրադարձավ:

Ոսկան ՍԱՐԳՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Օգոստոս 2015
Երկ Երե Չոր Հնգ Ուրբ Շաբ Կիր
« Հուլ   Սեպ »
 12
3456789
10111213141516
17181920212223
24252627282930
31