Լրահոս
Օրվա լրահոսը

Հովիկ Աբրահամյան. «Առաջին կիսամյակում Հայաստանում արձանագրվել է 4 տոկոս տնտեսական աճ»

Օգոստոս 31,2015 19:10

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Հովիկ Աբրահամյանը:

Բացելով նիստը վարչապետը դիմել է ներկաներին. «Ազգային վիճակագրական ծառայությունն այսօր  հրապարակել է  առաջին կիսամյակի տնտեսական աճի ցուցանիշերըԱռաջին եռամսյակում, ըստ ճշգրտված տվյալների, ունեցել ենք  ՀՆԱի   2,5 տոկոս, իսկ երկրորդ եռամսյակում  5,1 տոկոս տնտեսական աճ, արդյունքում ունենք շուրջ 4 տոկոս կիսամյակային տնտեսական աճ: Արտերկրից եկող տրանսֆերտների էական նվազման պարագայում հատկապես կարևորվում է գյուղատնտեսական ոլորտում արձանագրված աճը, որը լրջորեն մեղմում է արտաքին գործոններով պայմանավորված մեր քաղաքացիների գնողունակության կորուստը, ինչպես նաև մեր արտահանման բազմազանությունը: Մենք այսօր ապրանք ենք արտահանում ավելի շատ երկրներ: Հանձնարարում եմ տնտեսության ոլորտի բոլոր գերատեսչություններին՝ հանրությանը մանրամասն ներկայացնել կիսամյակի տնտեսական արդյունքները»:

Կառավարությունը կմեղմի բնակչության և ՓՄՁ-ների ծախսած էլեկտրաէներգիայի սակագինը

ՀՀ կառավարությունը որոշում է ընդունել  2015թ. օգոստոսի 1-ից մինչև էներգետիկայի բնագավառում կարգավորման խորհրդատվական ծառայության արդյունքների ստացումը, սպառած էլեկտրական էներգիայի մասով՝ ս.թ. օգոստոսի 1-ից գործող սակագները մեղմացնելու համար բնակչության (ամսական սպառված ամբողջ էլեկտրաէներգիայի մասով) և 0,38 կՎ լարմամբ՝ ամսական մինչև 500 կՎտժ էլեկտրական էներգիայի սպառում ունեցող  այլ սպառողների (ամսական մինչև 250 կՎտժ էլեկտրական էներգիայի սպառման մասով) օգտին վճարել սուբսիդիաներ 6,93 դրամ/կՎտժ չափով: Հովիկ Աբրահամյանը նշել է. «Հանրապետության Նախագահի հետ այսօր առավոտյան քննարկել ենք նաև փոքր և միջին ձեռնարկատերերին աջակցելու հարցը և որոշում ենք կայացրել կառավարություն ներկայացնել այս նախագիծը, որով փորձում ենք լուծել նաև ՓՄՁ-ների հարցը»: Վարչապետի խոսքով՝ հոսանքի դիմաց նրանց ծախսած 6,93  դրամ հավելավճարը կփոխհատուցի կառավարությունը՝ մինչև խորհրդատվության ավարտը: Հանձնարարվել է նաև ՀՀ էներգետիկայի և բնական պաշարների նախարարին՝ էներգետիկայի բնագավառում կարգավորման խորհրդատվական ծառայության արդյունքների մասին հաշվետվությունը ստանալուց հետո առաջարկություն ներկայացնել ՀՀ կառավարություն:

Գործադիրը հավանություն է  տվել  ՀՀ Սահմանադրության փոփոխությունների նախագծի վերաբերյալ ՀՀ կառավարության առաջարկներին: Վարչապետը նշել է, որ նախօրեին փոխվարչապետ Վաչե Գաբրիելյանի, կառավարության աշխատակազմի ղեկավարնախարար Դավիթ Հարությունյանի և ՀՀ արդարադատության փոխնախարար Արսեն Մկրտչյանի հետ  քննարկել են նախարարությունների և գերատեսչությունների բոլոր առաջարկությունները: Վարչապետի դիտարկմամբ՝  կան քննարկման արժանի առաջարկություններ: Այսօր կառավարության ղեկավարը ՀՀ Նախագահի հետ պայմանավորվել է, որ Ազգային ժողովում կկազմակերպվեն քննարկումներ, որոնց կմասնակցեն նաև նախարարները, գերատեսչությունների ղեկավարները: Կառավարության առաջարկությունների վերաբերյալ ընդհանուր հայտարարի գալուց և դրանք ի մի բերելուց հետո փաստաթուղթը կստորագրվի և կներկայացվի ՀՀ Ազգային ժողով:

Կմեծանա  գազի բալոնների շահագործման անվտանգությունը

Գազաբալոնային համակարգերով լրակազմված ավտոտրանսպորտային միջոցների շահագործման անվտանգության  օրենսդրական համալիր լուծման նպատակով կառավարությունը փոփոխություններ և լրացումներ է կատարել նախկինում ընդունած որոշումներից մեկում: Համալիր լուծումներն ուղղվելու են Հայաստանում սեղմված բնական գազով աշխատելու համար գազաբալոնային համակարգերով լրակազմված ավտոտրանսպորտային միջոցների շահագործման անվտանգության բարձրացմանը, գազաբալոնային համակարգերի տեղադրմանը, վկայագրման գործունեությունների կազմակերպման կանոնակարգմանը, գազաբալոնային սարքավորումներով վերասարքավորված տրանսպորտային միջոցների լիցքավորման ժամանակ դժբախտ պատահարների կանխարգելմանը: Այդ նպատակով ձևավորվել է մասնագիտական աշխատանքային խումբ, որը օրենսդրական փոփոխությունների կատարման համար անհրաժեշտ օրենքների ցանկը և առաջարկվող փոփոխությունների հայեցակարգային մոտեցումները կներկայացնի կառավարություն: Վարչապետ Հովիկ Աբրահամյանը շեշտել է այս ոլորտում պատկան մարմինների՝ ՀՀ տրանպորտի և կապի, ՀՀ տարածքային կառավարման և արտակարգ իրավիճակների նախարարությունների պարտականությունների պատշաճ կատարման, լիազորությունների սահմանազատման կարևորությունը : 

«Օրենսդրության կարգավորման ազգային կենտրոն»-ն (ՕԿԱԿ) ուսումնասիրել  և առաջարկություններ է ներկայացնել էներգետիկայի և բնական պաշարների ոլորտը  կարգավորող իրավական ակտերի կրճատման, պարզեցման, մասնավորապես, դրանցով սահմանված տնտեսապես ոչ արդյունավետ և աննպատակահարմար մեխանիզմների կրճատման վերաբերյալ: Ըստ այդմ, առաջարկվում է ուժը կորցրած ճանաչել ՀՀ կառավարության 1997 թվականի նոյեմբերի 27-ի «ՀՀ տարածքում հեղուկ գազի լցավորման շարժական կայանների անվտանգ շահագործման կարգը հաստատելու մասին» համապատասխան  որոշումը:

Սոցիալական որոշ խնդիրներին կտրվեն լուծումներ

Կառավարությունն իր նախկին որոշումներից մեկում կատարել է փոփոխություն և լրացումներ, որոնցով, մասնավորապես, առաջարկվում է  արտոնություններ սահմանել հակառակորդի հետ անմիջական շփման պայմաններում մարտական հերթապահություն կատարող շարքային կազմի պայմանագրային զինծառայողների ընտանիքների ընտանեկան կամ սոցիալական նպաստի նշանակման ժամանակ: Ներկայումս վերջիններիս աշխատանքի վարձատրությանն ուղղված միջոցները, ընտանիքների անապահովության գնահատման ժամանակ, դիտվում են որպես եկամուտ, ինչը գրեթե բացառում է նրանց ընտանիքների ընտանեկան կամ սոցիալական նպաստ ստանալու հավանականությունը:

Ուկրաինայում տեղի ունեցած դեպքերի հետ կապված Հայաստանի Հանրապետությունում բնակություն հաստատած անձանց սոցիալական իրավունքներն ապահովելու նպատակով կառավարավությունն ընդունել է համապատասխան որոշում: Վերջիններիս կենսաթոշակ, ինչպես նաև ծերության նպաստ, հաշմանդամության նպաստ, կերակրողին կորցնելու դեպքում նպաստ կնշանակվի և կվճարվի ՀՀ օրենսդրությամբ սահմանված կարգով` հաշվի առնելով սույն որոշման դրույթները: Մասնավորապես, որոշ  դեպքերում համապատասխան փաստաթղթերը չեն պահանջվի:

Սոցիալական ոլորտին վերաբերող մեկ այլ որոշմամբ 2016 թվականը Հայաստանում հայտարարվել է  հաշմանդամություն ունեցող անձանց համար հավասար հնարավորությունների տարի: Կառավարությունը հավանություն է տվել նաև այդ կապակցությամբ անցկացվելիք միջոցառումների ցանկին:

Օրենսդրական նախաձեռնություններ

Կառավարության հավանությանն է արժանացել «Պետական տուրքի մասին» Հայաստանի Հանրապետության օրենքում լրացում կատարելու մասին» ՀՀ օրենքի նախագիծը, որի ընդունումը պայմանավորված է ՀՀ օրենսդրությունը «Ապրանքների արտաքին առևտրի ոլորտում լիցենզավորման կանոնների մասին» համաձայնագրին համապատասխանեցնելու անհրաժեշտությամբ:

Կառավարության նիստում քննարկվել է ԱԺ պատգամավոր Թևան Պողոսյանի օրենսդրական նախաձեռնության կարգով ներկայացրած «Ազգային ժողովի կանոնակարգ» ՀՀ օրենքում փոփոխություններ և լրացումներ կատարելու մասին» ՀՀ օրենքի նախագիծը: Օրինագծով նախատեսվում է կանոնակարգել ՀՀ կառավարությանը հարցերով դիմելու կարգը և հնարավորություն տալ նիստի սկզբում՝ առաջինը հնչեցնել բանավոր հարցերը, այնուհետև՝ գրավոր հարցերը, քանի որ, երբեմն, գրավոր հարցերի առատության պատճառով պատգամավորները զրկվում են բանավոր հարցերով հանդես գալու հնարավորությունից: Կառավարությունը ձեռնպահ է մնացել դիրքորոշում ներկայացնելու հարցում, քանի որ  օրենսդրական նախաձեռնությունն ուղղված է ԱԺ գործունեության կարգի սահմանմանն ու վերաբերում է դրա կազմակերպման արդյունավետությանը:

Ղեկավարվելով «Ազգային ժողովի կանոնակարգ» ՀՀ օրենքի համապատասխան  հոդվածով՝ գործադիրը որոշել է անհետաձգելի համարել «ՀՀ քաղաքացիական օրենսգրքում լրացումներ կատարելու մասին» և «Դատական ակտերի հարկադիր կատարման մասին» ՀՀ օրենքում լրացում կատարելու մասին» ՀՀ օրենքների  նախագծերը:

Վերոնշյալ օրինագծերը սահմանված կարգով կներկայացվեն  Ազգային ժողով:

Միջազգային համագործակցություն

Գործադիրն իր համաձայնությունն է  տվել «Հայաստանի Հանրապետության կառավարության և Չինաստանի Ժողովրդական Հանրապետության կառավարության միջև առևտրական ներկայացուցչությունների փոխադարձ հիմնման մասին» համաձայնագրի կնքման առաջարկությանը, որը կնպաստի երկու երկրների միջև առևտրատնտեսական կապերի զարգացմանը:

Հայաստանի և Մոնղոլիայի միջև բարեկամական հարաբերությունների զարգացման և ամրապնդման նպատակով կառավարությունն իր համաձայնություն է տվել երկու երկրների կառավարությունների միջև մշակույթի, կրթության և գիտության բնագավառներում համագործակցության մասին համաձայնա­գիրը կնքելու առաջարկությանը:

Հայաստանի Հանրապետության կողմից երրորդ երկրների հետ առևտրի դեպքում արգելված և սահմանափակման ենթակա ապրանքների կանոնակարգման գործընթացում առկա խոչընդոտների վերացման անհրաժեշտությամբ կառավարարությունը փոփոխություններ և լրացումներ է կատարվել նախկինում ընդունված որոշումներից մեկում:

Կառավարությունն ընդունել է «Բրազիլիայի Դաշնային Հանրապետության սովորական անձնագիր կրող քաղաքացիներին Հայաստանի Հանրապետության մուտքի վիզա ձեռք բերելու պահանջից ազատելու մասին» որոշումը: Կարգավորման նպատակն է այդ  քաղաքացիների համար փոխադարձության սկզբունքի հիման վրա սահմանել առանց մուտքի արտոնագրի ռեժիմ` ՀՀ տարածք մուտք գործելու օրվանից 90 օրը չգերազանցող  ժամանակահատվածով, որը հնարավոր է երկարաձգել 90 օրով:

Այլ որոշումներ

2015թ. օգոստոսի 22-ին Արարատի մարզում տեղի ունեցած ուժեղ քամու պատճառած վնասների հետևանքները մեղմելու նպատակով  կառավարությունը  Արարատի մարզպետարանին հատկացրել է ավելի քան 55 մլն դրամ:

Գործադիրը հավանություն է տվել «Համո Բեկնազարյանի անվան «Հայֆիլմ» կինոստուդիա» ՓԲԸ-ի բաժնետերերի 2015 թվականի օգոստոսի 21-ի ընդհանուր ժողովի որոշմանը` ընկերության 100 տոկոս բաժնետոմսերը  Հայաստանի Հանրապետությանը վերադարձնելու մասին:

Նիստում որոշվել է N 62 ավագ դպրոցն անվանակոչել Հայաստանի ազգային հերոս Թաթուլ Կրպեյանի անունով։

ՀՀ կառավարության այսօրվա նիստում որոշում է ընդունվել Ֆիրդուս Զաքարյանին նշանակել ՀՀ սփյուռքի նախարարության աշխատակազմի ղեկավար։

ՀՀ կառավարություն

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Օգոստոս 2015
Երկ Երե Չոր Հնգ Ուրբ Շաբ Կիր
« Հուլ   Սեպ »
 12
3456789
10111213141516
17181920212223
24252627282930
31