Երեւանի Սեբաստիա թաղամասում այսօր համեստ պայմաններում բացվեց «Նարվա» շախմատի դպրոցի երրորդ մասնաճյուղը:
Դպրոցի տնօրեն Նարեկ Վարազդատյանը փոքրաթիվ աշակերտների, նրանց ծնողների եւ իր համախոհների ներկայությամբ ժապավենը կտրելով՝ բոլորին հրավիրեց ներս: Երկու սենյակ, շախմատի խաղատախտակներ եւ ցուցատախտակներ, համեստ գույք երեխաների համար, խոհանոց, սանհանգույց եւ տնօրենի աշխատասենյակ: Ահա այսքանը:
Aravot.am-ի հետ զրույցում Նարեկ Վարազդատյանը ներկայացրեց նոր դպրոցի ստեղծման պատմությունը: «Գաղտնիք չէր, որ «Նարվա» շախմատի ընդհանուր դպրոցը փակման եզրին էր: Չէինք կարողանում տարածքի վարձակալության գումարները վճարել, հարկային հարցերը լուծել, որոնցից չենք խուսափում: Չեմ թաքցնում: Ներկայումս դպրոցը պարտքեր ունի տարածքը վարձակալելու, գույքի ձեռքբերման, հարկայինի հարցերի հետ կապված: Խնդիրն այն է, որ դպրոցում կան 70 եւ ավելի անվճարունակ երեխաներ՝ սոցիալապես անապահով, ծնողազուրկ, հաշմանդամության կարգ ունեցող ընտանիքներից, ազատամարտիկների երեխաներ եւ թոռներ, որոնց հետ աշխատում ենք բացառապես անվճար հիմունքներով: Բայց այնքան քչացան վճարունակները, որ դպրոցը կանգնեց փակման եզրին: Այդ պատճառով հանդես եկա հայտարարությամբ՝ «Օգնենք կարիքավոր ընտանիքներին»:
Հաշմանդամների ասոցիացիայի հետ կապված ունեցանք հանդիպումներ: Դրամահավաք կազմակերպվեց, հավաքվեց որոշակի գումար, եղան նաեւ անհատ օգնողներ, որոնցից շատ շնորհակալ եմ: Իսկ մնացածն արեցի իմ ջանքերով»:
Հարցրինք, թե շախմատի ֆեդերացիան չի՞ օգնել: Ոչ շախմատի ֆեդերացիան, ոչ էլ որեւէ կազմակերպություն: Միայն անհատ մարդիկ: Այսօրվա բացման արարողության առիթով հրավեր ենք ուղարկել քաղաքապետ Տարոն Մարգարյանին, որը մայրաքաղաքի շախմատի ֆեդերացիայի նախագահն է, Շախմատի ֆեդերացիայի էլեկտրոնային հասցեին: Սակայն, ինչպես միշտ, որեւէ արձագանք չեղավ: Բայց ոչինչ: Դպրոցը հիմնվել է եւ մենք փորձում ենք անել ամեն ինչ, որպեսզի տարբեր երկրներում մեր դպրոցի աշակերտների շնորհիվ ճանաչեն մեր երկիրը», – ասաց Նարեկ Վարազդատյանը:
Աշոտ ՀԱԿՈԲՅԱՆ
