«Քաղաքացիական պայմանագիր» կուսակցության վարչության նախագահ Արայիկ Հարությունյանի համար սահմանային վերջին միջադեպերի նկատմամբ ԱԳՆ-ի լռությունը տարօրինակ է:
«Սրա մասին բոլոր ատյաններում պետք է բարձրաձայնվեր, որովհետեւ սա ինքնիշխան պետության սահմանների, խաղաղ բնակչության դեմ լուրջ ոտնձգություն է, պետք է սրա մասին խոսել, փորձել գտնել լուծումներ միջազգային ատյաններում»,- կարծում է Արայիկ Հարությունյանը:
Նրա խոսքով, պետք էր բարձրաձայնել ռազմաքաղաքական կառույցներում, այդ թվում նաեւ ՀԱՊԿ-ում. «Որը չգիտես ինչու Տաջիկստանում անցած շաբաթ տեղի ունեցած իրավապահների ու նախկին զինվորականների միջեւ տեղի ունեցած հրաձգության ու սպանության մասին հայտարարություններ էր տարածում, բայց սահմանամերձ գոտիների գնդակոծության մասին լռում է, այն ինչ Հայաստանն այդ կառույցի լիիրավ անդամ է, ու նման ոտնձգությունը ոտնձգություն է նաեւ ամբողջ կազմակերպության դեմ: Ինչ վերաբերում է պաշտպանական գերատեսչություններին, մեր՝ սահմանամերձ բնակավայրերի բնակիչների հետ հանդիպումներից հասկանալի դարձավ, որ մեր զինվորականները հնարավորության դեպքում լիարժեք պատասխան են տալիս ու փորձում լռեցնել այն կետերը, որտեղից առավել շատ են գնդակոծվում մեր բնակավայրերն ու դիրքերը: Բնակիչները մեծ խնդիրների մասին չէին խոսում»:
Արփինե ՍԻՄՈՆՅԱՆ