Սեպտեմբերի 10-ին 5-րդ գումարման ԱԺ-ի 7-րդ նստաշրջանի մոնիթորինգի արդյունքները հրապարակվեցին: Ըստ զեկույցի, ՀԱԿ խմբակցությունը ողջ նստաշրջանի ընթացքում ներկայացրել է 10 օրենսդրական նախաձեռնություն, որից 7-ի հեղինակը Հրանտ Բագրատյանն է:
Թե ինչ են արել մյուս պատգամավորները եւ ինչու նախագծեր չեն ներկայացնում, Aravot.am-ի հետ զրույցում խմբակցության պատգամավոր Գագիկ Ջհանգիրյանը պատասխանեց. «Մենք էլի ենք նախաձեռնություններ ներկայացրել անցած նստաշրջանում, նախանցյալ: Դուք շատ լավ հասկանում եք, որ ընդդիմության նախաձեռնությունները հանձնաժողովից այն կողմ չեն գնում: Մեծ օրակարգը, փոքր օրակարգը որոշում է քաղաքական մեծամասնությունը, իսկ քաղաքական մեծամասնությունը նախեւառաջ անցկացնում է իր նախագծերը: Դրա համար որեւէ ընդդիմադիր խմբակցություն կամ պատգամավոր չի կարող գլուխ գովել, թե ինքը շատ օրենսդրական նախագծեր է անցկացրել Ազգային ժողով: Դա հնարավոր չի: Անպայման պետք է ինչ-որ բանակցությունների գնալ, կոմպրոմիսների գնալ, որ հաջողությունների հասնես»:
Գագիկ Ջհանգիրյանը, ըստ զեկույցի, ամենաշատ ձեռնպահ քվեարկած պատգամավորների տասնյակում է:
Կարդացեք նաև
Այս առնչությամբ մեր հարցին, թե ինչո՞ւ է այդքան շատ ձեռնպահի կոճակը սեղմել՝ Գագիկ Ջհանգիրյանը պատասխանեց, որ եթե լավ նախագծեր են լինում, պիտի լավին լավ ասես. «Ի՞նչ անենք, ձեռնպահ եմ քվեարկել, եթե կա օրենսդրական նախաձեռնություն, որին կողմ ես, բայց կա նաեւ 1-2 դրույթ, որոնց դեմ ես եւ քեզ չի հաջողվում փոխել այդ դրույթները, դուք ինչպե՞ս կքվեարկեք: Կամ պիտի կողմ-ը գերակշռի, կամ դեմ-ը: Եթե չես կարողանում, այդ ժամանակ ձեռնպահ ես քվեարկում, ի՞նչ կա, որ»:
Հռիփսիմե ՋԵԲԵՋՅԱՆ
