Սեպտեմբերի 11-ից հոկտեմբերի 24-ը արվեստասեր հանրությունը հնարավորություն կունենա Կոմիտասի թանգարան-ինստիտուտում կողք կողքի տեսնելու Երվանդ Քոչարի, Լևոն Թութունջյանի, Սալվադոր Դալիի, Մինաս Ավետիսյանի, ժամանակակիցներից՝ Արա Ալեքյանի, Համլետ Հովսեփյանի, Խաչատուր Մարտիրոսյանի, Աշոտ Հարությունյանի, Նարեկ Ավետիսյանի, Մերի Մունի, Արման Համբարձումյանի և այլոց որոշ ստեղծագործություններ:
«Մոդեռնից պոստմոդեռն». ահա այս խորագիրն է կրում ցուցահանդեսը, որտեղ ներկայացված են 18 հեղինակների 40-ից ավելի աշխատանքներ:
Ցուցահանդեսը կազմակերպել է «Բարձր արվեստ» կերպարվեստի կենտրոնը՝ Կոմիտասի թանգարան-ինստիտուտի և ՀՀ մշակույթի նախարարության հետ համատեղ:
«Ուշագրավ է, որ բացառապես մասնավոր հավաքածուների աշխատանքներ են ներկայացված, և կարծում եմ՝ կարիք չկա ևս մեկ անգամ փաստելու, որ ընտրությունը շատ խիստ ձևով է կատարվել, որովհետև Կոմիտասի խստապահանջ հայացքը հետևում է մեզ ամենուրեք և հատկապես այս պատերի ներսում»,- այսօր՝ ցուցահանդեսի պաշտոնական բացման ժամանակ, լրագրողների հետ զրույցում ասաց ՀՀ մշակույթի նախարար Հասմիկ Պողոսյանը:
Կարդացեք նաև
Նրա գնահատմամբ՝ հայ ժամանակակից արվեստն իր ուրույն տեղն ունի համաշխարհային ժամանակակից արվեստում: Ապացույցներից մեկն էլ Վենետիկի այս տարվա բիենալեն էր. «Ես իմ բոլոր գործուղումների ժամանակ միշտ ժամանակ եմ գտնում այցելելու ժամանակակից արվեստի թանգարաններ ու տեսնելու ընդհանրապես ինչ զարգացումներ կան այլ երկրներում: Եվ հպարտությամբ եմ միշտ նշում, որ մեր արվեստագետները բարձր մակարդակի վրա են գտնվում»,- նշեց նախարարը:
Սիրանուշ ՀԱՅՐԱՊԵՏՅԱՆ
