Բաքվում մեկնարկած շախմատի աշխարհի գավաթի խաղարկության շրջանակներում այսօր կայանալու են թայ-բրեքի հանդիպումները, որոնցում առաջին շրջանի արգելքը հաղթահարելու համար պայքարելու են երեք հայ շախմատիստներ՝ Գաբրիել Սարգսյանն ու Սամվել Տեր-Սահակյանը՝ Հայաստանից եւ Սամուել Սեւյանը՝ ԱՄՆ-ից: Նրանք սկզբում մրցակիցների հետ խաղալու են երկու արագ պարտիա: Եթե հաղթող կրկին չլինի, անցկացվելու է կայծակնային շախմատի եւս երկու հանդիպում: Կրկին հավասարության դեպքում կկայանա, այսպես կոչված «Արմագեդոն»:
Գաբրիել Սարգսյանի մրցակիցը չեխ Մաթեուշ Բարտելն է, որի հետ հարցերը Գաբին պետք է աշխատի լուծել արագ շախմատում, որտեղ իրեն ավելի վստահ է զգում: Սամվել Տեր-Սահակյանը դժվարին ճանապարհ ունի անցնելու ռուսաստանցի Նիկիտա Վիտյուգովի հետ: Անչափ հետաքրքիր դիմակայություն է սպասվում պատանի Սամուել Սեւյանի եւ ադրբեջանի ուժեղագույն գրոսմայստերներից՝ բազմափորձ Թեյմուր Ռաջաբովի միջեւ: Սամուելը առաջին շրջանի դասական երկու պարտիաներում ոչ-ոքի է արել: Նա իրեն գերազանց է զգում նաեւ արագ ու կայծակնային շախմատներում: Սակայն Ռաջաբովն էլ պակաս չէ: Ավելին, նա բավականին հաղթանակներ է տարել ամենատարբեր բարձրակարգ մրցաշարերում: Բայց խնդիրն այն է, որ ադրբեջանցին վերջին շրջանում գրեթե հանդես չի եկել խոշոր մրցումներում:
Աշոտ ՀԱԿՈԲՅԱՆ
Լուսանկարը՝ en.chessbase.com-ի
Կարդացեք նաև
