Հայկ Խանումյանի կարծիքով՝ միջնորդ երկրները պետք է խուսափեն Արցախի ընտրությունների վերաբերյալ անիմաստ հայտարարություններ անելուց
«Այս ընտրությունները ես որակում եմ որպես անհետաքրքիր ընտրություններ»,- Aravot.am-ի հետ զրույցում, անդրադառնալով սեպտեմբերի 13-ին Լեռնային Ղարաբաղում տեղի ունեցած տեղական ինքնակառավարման մարմնի ընտրություններին, ասաց ԼՂՀ ԱԺ պատգամավոր, «Ազգային վերածնունդ» կուսակցության նախագահ Հայկ Խանումյանը:
Նա նկատեց, որ ՏԻՄ ընտրությունների ընթացքում մրցակցությունը ակտիվ չէր: Հայկ Խանումյանը այդտեղ տեսնում է նաեւ «Ազգային վերածնունդի» «մեղքի բաժինը». «Մեր կուսակցությունը ռեսուրսների սղության պատճառով ակտիվություն չկարողացավ ցուցաբերել, քանզի խորհրդարանական ընտրությունները նոր են վերջացել, եւ մեր կուսակցության համար բավականին ծանր է այդ մասշտաբի ընտրություններին մասնակցելը՝ ռեսուրսների, ֆինանսական առումով: Համայնքներից կեսում, փաստորեն, մրցակցություն չկար, այսինքն՝ մեկ թեկնածու էր ներկայացված, մրցակցություն չկար նաեւ Ստեփանակերտում, որտեղ երկու թեկնածու կար, որոշակի ակտիվություն կար ավագանու ընտրություններին»:
ԱՄՆ պետդեպի խոսնակ Ջոն Քիրբին հայտարարել էր, որ հակամարտության համապարփակ կարգավորման համատեքստում ԱՄՆ ճանաչում է Լեռնային Ղարաբաղի բնակչության դերը իրենց ապագան որոշելու հարցում: Նա հավելել էր, որ այնուամենայնիվ, ԱՄՆ-ն չի ճանաչում Լեռնային Ղարաբաղը որպես անկախ ինքնիշխան պետություն. «Եվ մենք չենք ընդունելու սեպտեմբերի 13-ի «այսպես կոչված» ընտրությունները որպես ազդող գործոն տարածաշրջանի իրավական կարգավիճակի վրա»:
Կարդացեք նաև
Անդրադառնալով այս հայտարարությանը՝ Հայկ Խանումյանն ասաց, որ Արցախում ընտրություններից առաջ Ադրբեջանը միշտ դիվանագիտական ակտիվություն է ցուցաբերում, որպեսզի այլ երկրները հայտարարություն անեն այդ ընտրությունները չճանաչելու վերաբերյալ. «Ի՞նչ է նշանակում ընտրությունները չճանաչել, հատկապես՝ տեղական ինքնակառավարման մարմինների ընտրությունները: Ցանկացած ժողովուրդ, ցանկացած համայնքի բնակիչ իրավունք ունի ընտրությունների միջոցով կազմակերպել իր համայնքային կյանքը, իր քաղաքական կյանքը, իր պետական կյանքը, եւ այլն, ձեւավորել իր իշխանությունները՝ ազգային եւ համայնքային իշխանությունները: Ընտրության իրավունքը չճանաչելն աբսուրդ է, եւ որեւէ երկիր չի կարող ճանաչել մեկ այլ երկրի ընտրություն անցկացնելու կամ չանցկացնելու իրավունքը կամ ընտրական իրավունքը»:
Հայտարարությանը հատվածը, թե ընտրությունները չեն կարող ազդել Լեռնային Ղարաբաղի կարգավիճակի վրա, ըստ նրա, Ադրբեջանի ճնշման տակ է արվել: Նա այդպիսի հայտարարությունները անիմաստ որակեց. «Միջազգային տարբեր փաստաթղթերով պարտավորվել են Արցախի հարցի շուրջ բանակցել նաեւ Արցախի ժողովրդի ընտրված ներկայացուցիչների հետ, այսինքն՝ եթե ընտրությունները չկան, ինչպե՞ս կարող են լինել ընտրված ներկայացուցիչներ: Մի խոսքով՝ տարբեր պետություններ եւ հատկապես՝ միջնորդ երկրները պետք է խուսափեն Արցախի ընտրությունների վերաբերյալ անիմաստ հայտարարություններ անելուց: Օրինակ՝ նրանք կարող էին դիտորդներ ուղարկել՝ պարզելու համար՝ համապատասխանո՞ւմ են, թե՞ չեն համապատասխանում այս կամ այն չափանիշներին: Ժողովրդի ընտրության իրավունքը չճանաչելը կամ ընդհանուր ընտրությունները չճանաչելն աբսուրդ է եւ անիմաստ»:
Ամի ՉԻՉԱԿՅԱՆ
