Գործով ապացույց կրիչի վնասված լինելու պատճառով դատական նիստը հետաձգվեց
Վերաքննիչ քրեական դատարանը սեպտեմբերի 17-ին դատավոր Աշոտ Աբովյանի նախագահությամբ քննում էր Արգիշտի Կիվիրյանի գործը:
Հիշեցնենք՝ Վարչական դատարանը բավարարել էր ոստիկանության հայցը եւ Արգիշտի Կիվիրյանի նկատմամբ նշանակվել է վարչական պատասխանատվություն՝ տուգանք 50 հազար դրամի չափով:
Դատական նիստի ընթացքում նախագահող դատավոր Աշոտ Աբովյանը ընթերցեց Արգիշտի Կիվիրյանի եւ նրա ներկայացուցիչ Արամազդ Կիվիրյանի բողոքը, ըստ որի՝ նրանք դատարանին խնդրում էին բեկանել Վարչական դատարանի վճիռը:
Կարդացեք նաև
Ոստիկանությունն իր դիրքորոշումը չէր ներկայացրել դատարանին, ոստիկանության ներկայացուցիչ Սոնա Մելիքյանը նշեց, որ դիրքորոշումը համարում է ներկայացված Վարչական դատարանում:
Դատավոր Արա Սարգսյանը հետաքրքրվեց, թե Արգիշտի Կիվիրյանին քանի՞ ժամ են անազատության մեջ պահել: Սոնա Մելիքյանը պատասխանեց, որ չեն գերազանցվել վարչական ձերբակալման ժամերը: Նա հավելեց, որ դա նաեւ ապացուցվել է գործով վկայի ցուցմունքով: Նա նշեց, որ Արգիշտի Կիվիրյանի ազատությունը 3 ժամ չի սահմանափակվել, նրա ազատության սահմանափակումն արձանագրվել է այն պահին, երբ ազատությունը սահմանափակվել է:
Դատավորը հետաքրքրվեց, թե այդ դեպքում ինչպե՞ս են արձանագրել, Սոնա Մելիքյանը պատասխանեց, որ ձերբակալում իրականացնող ոստիկանը նշում է, թե որ ժամերի սահմանում է քաղաքացու ազատությունը սահմանափակվել:
Արա Բաբայանը հետաքրքրվեց՝ եթե քաղվածքում նշված է 12:45-ի սահմաններում, կարելի՞ է եզրակացնել, որ 12: 20 է իրականացվել ձերբակալությունը, նա պատասխանեց՝ այո:
Դատավորը հետաքրքրվեց նաեւ, թե ոստիկանության ներկայացուցիչը ծանո՞թ է քննիչի եզրահանգման հետ, որ Արգիշտի Կիվիրյանի ազատությունը սահմանափակվել է 12:20- 12:30-ից մինչեւ 15:40, Սոնա Մելիքյանը պատասխանեց՝ «Դա գրեթե երեք ժամ է, մի փոքր ավելի մի փոքր քիչ: Ժամ-ժամացույցի խնդիր է»:
Արա Բաբայանը հետաքրքրվեց նաեւ, թե ժամային սահմանն ինչքա՞ն է սահմանվում, ոստիկանության ներկայացուցիչը պատասխանեց՝ 20-25 րոպե:
Նախագահող դատավոր Աշոտ Աբովյանը հայտարարեց, որ Արամազդ Կիվիրյանի՝ որպես ապացույց ներկայացված կրիչը վնասված է, Արամազդ Կիվիրյանը պատրաստակամություն հայտնեց մի քանի օրերի ընթացքում ներկայացնել դատարանին ապացույցը:
Գործով ապացույց կրիչի վնասված լինելու պատճառով դատական նիստը հետաձգվեց, քանի որ ըստ նախագահող դատավորի՝ դա արգելք է համարվում բողոքի քննությանը; Հաջորդ դատական նիստը տեղի կունենա հոկտեմբերի 23-ին:
Ամի ՉԻՉԱԿՅԱՆ
