Ընդդեմ Սահմանադրական փոփոխությունների ԱԻՄ-ականների նախատեսած Մաշտոցի, Բաղրամյանի պողոտաներից մինչեւ Պռոշյան փողոց երթ անցկացնելու ծրագիրը այսօր չիրականացավ: Ազատության հրապարակում հավաքված ԱԻՄ-ականների փոքրաթիվ խումբը որոշեց, որ անիմաստ է այդ երթուղով երթ անցկացնելը, որովհետեւ աշխատանքային ժամն ավարտվել է:
Նրանք սահմանափակվեցին միայն «մինի» հանրահավաքով: ԱԻՄ առաջնորդ Պարույր Հայրիկյանն ասաց, որ իրենց համար կարեւորը քաղաքացիների բարձրացրած հարցերն են. «Եթե որեւէ մեկը ցավ է ապրում, մեր խնդիրն է այդ ցավը նվազագույնի հասցնել»:
Անդրադարձավ նաեւ «Ոչ-ի» ճակատին, ասաց՝ չեն շեղվելու միասին հանդես գալու, միասին հարցեր լուծելու հրամայականից: Հետո հիշեցրեց, որ ամռան սկզբին կրկին Ազատության հրապարակում հրապարակային քննարկում հնարավորություն տվեց քաղաքական ուժերին ի մի գալ, եւ ստեղծվեց «Հանրային փրկության» դաշինք. «Ինչու հենց այդ անունը որդեգրվեց, որովհետեւ հանրությունը կանգնած է լուրջ վտանգի առջեւ: Մեր ամբողջ հանրությունն է վտանգի առջեւ, դրանից ելնելով՝ վեց քաղաքական ուժ սկզբունքային համաձայնագիր ստորագրեցին, բայց որ սահմանազատում չնկատվի, դրանցից չորսը հետագայում միացան «Չեք անցկացնի» նախաձեռնության հայտարարությանը»:
Ըստ նրա, «Հանրային փրկության» Դաշինքի նպատակն է՝ բոլոր արմատական դիրքորոշում ունեցող քաղաքական ուժերին, նախաձեռնություններին, համախմբել. «Որովհետեւ մեր ժողովրդի նկատմամբ դավադրություն է իրականացվում»:
Կարդացեք նաև
Վերջում էլ հավելեց, որ թե ոչ են ասում չակերտավոր սահմանադրական բարեփոխմանը, կատարում են հանրաքվեի պահանջը. «Ժողովրդի դեմ դավադրություն են այս իշխանությունները իրականացնում ու այդ դավադրությունը խորապես մտածված է ու հեռահար նպատակներ ունի, պետք է պայքարել այդ դավադրության դեմ»:
Արփինե ՍԻՄՈՆՅԱՆ
