«Ոչ մի խաղաղ ցուցարար չպետք է վախենա դաժան ծեծից միայն իր կարծիքն արտահայտելու համար։ Սմբատ Հակոբյանի դեմ սարսափելի հարձակման հետաքննությունը իրապես կապացուցի, թե Հայաստանի կառավարությունն ինչքան լուրջ է վերաբերվում ազատ արտահայտվելու եւ խաղաղ հավաքների իրավունքների վերաբերյալ իր հանձնառությունը»,- այս հայտարարությունն այսօր արել է «Human Rights Watch» միջազգային իրավապաշտպան կազմակերպության Եվրոպայի ու Կենտրոնական Ասիայի հարցերով փոխտնօրեն Ռեյչել Դենբերը։
Հիշեցնենք, որ սեպտեմբերի 21-ին «Հայազն» կուսակցության կազմակերպած ինքնիշխանության երթի ընթացքում դաժան ծեծի էր ենթարկվել «Ազատամարտիկների դաշինք»-ի անդամ Սմբատ Հակոբյանը։
«Human Rights Watch»-ը հիշեցրել է, որ Հայաստանը Մարդու իրավունքների եվրոպական կոնվենցիայի մասնակից է եւ ունի հստակ պարտավորություններ ոչ միայն հարգելու ազատ հավաքների իրավունքը, այլեւ ապահովելու այդ իրավունքից օգտվող անձանց անվտանգությունն ու պաշտպանելու նրանց ուրիշների ապօրինի միջամտությունից։
«Հայաստանի ժողովրդին խաղաղ բողոքի ցույցերին մասնակցելու համար չպետք է սպառնան լուրջ վնասվածքներ։ Կառավարությունը պետք է հստակ ցույց տա, որ ցանկացած մարդ, որը կխոչընդոտի խաղաղ ցուցարարների գործունեությանը, կպատժվի օրենքի ամբողջ խստությամբ»,- ավելացրել է Ռեյչել Դենբերը։
Կարդացեք նաև
Պատրաստեց Աշոտ ԻՍՐԱԵԼՅԱՆԸ
