Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստերի ընթացքում ադրբեջանցիները պարբերաբար շահարկում են այն հարցը, թե իբր ԼՂՀ-ն և Հայաստանը խոչընդոտում են ԵԽԽՎ պատվիրակներ Ռոբերտ Ուոլտերին և Միլիցա Մարկովիչին փաստահավաք առաքելություն իրականացնել:
Aravot.am-ի հետ զրույցում ԵԽԽՎ հայաստանյան պատվիրակության ղեկավար Հերմինե Նաղդալյանը երեկ փոխանցեց, որ ԵԽԽՎ քաղաքական հարցերի հանձնաժողովում, երբ տեղի է ունեցել Լեռնային Ղարաբաղի մասին զեկույցի նախապատրաստական աշխատանքների ներկայացում, Ուոլտերը դժգոհություն է հայտնել այն մասին, որ ինքը մինչ օրս չի կարողացել ԼՂՀ այցելություն կատարել: Մինչդեռ Հերմինե Նաղդալյանի պնդմամբ` զեկուցողը միայն մեկ շաբաթ առաջ է դիմել ԼՂՀ իշխանություններին, այն դեպքում, երբ մեկ տարի ժամանակ ուներ:
Aravot.am-ը ԼՂՀ նախագահի մամուլի քարտուղար Դավիթ Բաբայանից հետաքրքրվեց՝ ի՞նչ դիրքորոշում ունեն Արցախի իշխանությունները Ուոլտերի այցի հետ կապված և նրա նամակի պատասխանը արդեն ե՞րբ պարզ կլինի:
Պարոն Բաբայանը պատասխանեց, որ իրենց դիրքորոշումն այս հարցում չի փոխվել ու մանրամասնեց. «Եթե չի փոխում զեկույցի վերնագիրը և չի վերանայում դրա փիլիսոփայությունը, այդ դեպքում ինչի՞ մասին կարելի է խոսել: Մենք բազմիցս ասել ենք, թե ինչպիսի զեկույց ենք ուզում, որ լինի: Մենք չենք ուզում, որ լինի միակողմանի զեկույց, եթե օբյեկտիվություն չկա այդ զեկույցում, սա արդեն լուրջ խնդիր է նույն Եվրոպայի համար, քանի որ սուբյեկտիվ զեկույցները ոչ մի բանի չեն ծառայում»: Պարոն Բաբայանը տեղեկացրեց, որ Ուոլտերի նամակի պատասխանը քննարկման փուլում է, և առաջիկայում այդ մասին ԼՂՀ ԱԳՆ-ն կտեղեկացնի: Դավիթ Բաբայանը տրամաբանական է համարում, որ Ադրբեջանը պետք է այս հարցը շահարկեր, ինչ վերաբերում է զեկույցին, ապա նա նշեց, որ այն «ամենայն հավանականությամբ պատրաստվել է Ադրբեջանում, և այդ զեկույցից խավիարի հոտ է գալիս»:
Կարդացեք նաև
ԼՂՀ ԱԳՆ մամուլի քարտուղար Անի Սարգսյանն էլ Aravot.am-ին փոխանցեց հետևյալը. «Մենք ստացել ենք Ուոլտերի դիմումը, այն ուսումնասիրվում է»:
Տաթև ՀԱՐՈՒԹՅՈՒՆՅԱՆ
