«Մեծամոր» պատմահնագիտական թանգարանում այսօր բացվեց համալրված ցուցադրություն, որում ներկայացվում են Մեծամորի հնավայրում պեղված գտածոները, այդ թվում՝ 60-ականներից մինչեւ նախորդ տարի հայտնաբերվածները: «Մեծամորը Մ.թ.ա. 5-րդ հազարամյակից պարբերաբար բնակեցված է եղել: 6,5 հազար տարի այս բլուրների վրա կյանքը շարունակվել է: Հնավայրն այսօր Մերձավոր Արեւելքի ամենաէտալոնային հուշարձաններից է»,-լրագրողների հետ զրույցում ասաց «Պահպանության ծառայություն» ՊՈԱԿ-ի գիտական աշխատանքների գծով տնօրենի տեղակալ, հնագետ Աշոտ Փիլիպոսյանը:
DCIM105MEDIA
DCIM105MEDIA
Aravot.am-ը հնագետին խնդրեց առանձնացնել մի քանի բացառիկ ցուցանմուշ: «Այստեղ հայտնաբերված բոլոր անագե իրերը բացառիկ են ողջ Մերձավոր Արեւելքի համար: Խոսքը մի քանի հարյուր իրի մասին է: Այստեղ գտնվել է այնքան անագ, որքան չի եղել անգամ Եգիպտական բուրգերում»,-ասաց Փիլիպոսյանը: Նա առանձնացրեց նաեւ եզակի գորտակերպ կնիք-կշռաքարը, որի մեկ օրինակը պահվում է բրիտանական թանգարանում: «Արժեքավոր են նաեւ եգիպտական փարավոն Թութմոս 3-րդի կնիքը եւ բաբելոնյան տիրակալներից մեկի ագաթե կնիքը»,-հավելեց մասնագետը:
DCIM105MEDIA
DCIM105MEDIA
DCIM105MEDIA
Հետաքրքրվեցինք նաեւ, թե ինչ են «խոսում» գտածոները՝ տեղի երբեմնի բնակիչների զարգացվածության մասին: «Դրանք ցույց են տալիս, որ 3,5 հազար տարի առաջ այս տարածքի տիրակալները կարողացել են հավասարը հավասարի պես խոսել Միտանիի, Եգիպտոսի եւ Խեթական պետության հետ»,-պատասխանեց Աշոտ Փիլիպոսյանը:
DCIM105MEDIA
DCIM105MEDIA
Նշենք, որ Մեծամորի հնավայրից հայտնաբերվել են նաեւ մեծ քանակության ծովախեցիներ՝ բերված Միջերկրական ծովից եւ Պարսից ծոցից: Թանգարանի ֆոնդերում կա 28 000 ցուցանմուշ, որից ցուցադրվում է 18.000-ը:
Լուիզա ՍՈՒՔԻԱՍՅԱՆ
