ԼՂՀ հոգեբույժների և հոգեբանների ասոցիացիայի և
Հայկական հոգեբուժական ասոցիացիայի
համատեղ հայտարարությունը
Կարդացեք նաև
Հոգեկան առողջության միջազգային օրվա առիթով
-Հիմք ընդունելով վերջին շրջանում ամբողջ աշխարհում, այդ թվում մեր տարածաշրջանում, տեղի ունեցող ռազմական գործողությունների և դրանցով պայմանավորված հասարակական լարվածության աճը, ինչպես նաև գլոբալ ֆինանսական ճգնաժամի դեռևս շարունակվող հետևանքները, որոնք չեն կարող չանդրադառնալ հասարակության հոգեկան առողջության վրա.
-հաշվի առնելով, որ նման իրավիճակներում հասարակության առավել խոցելի խմբերը, այդ թվում հոգեկան առողջության խնդիր ունեցող անձինք ավելի անպաշտպան են և օժանդակության կարիք ունեն.
-կարևորելով հոգեկան առողջության խնդիրներ ունեցող անձանց նկատմամբ առավել հոգատարության և ուշադրության անհրաժեշտությունը, ինչը բխում է նաև օրվա խորհրդից և կարգախոսից` «Արժանապատվություն և հոգեկան առողջություն».
Կոչ ենք անում.
-Պատկան մարմիններին և բոլոր կազմակերպություններին, որոնց գործունեությունն առնչվում է հասարակության լայն շերտերի հոգեկան առողջության հետ.
իրենց գործողություններում առաջնորդվել նվազագույնը` հասարակության հոգեկան առողջությունը չվնասելու սկզբունքով, իսկ առավելագույնը` անել հնարավորը, որպեսզի պահպանենք և ամրապնդենք բոլորի հոգեկան առողջությունը.
այդ նպատակով զերծ մնալ
- չստուգված, որևիցե գործնական նշանակություն չունեցող, միայն անհանգստություն և լարվածություն առաջացնող տեղեկատվության տարածումից
- ամբոխահաճո և իրականացման առումով անհնար կոչերից
Այն կազմակերպություններին և անձանց, որոնք աշխատում կամ առնչվում են հոգեկան առողջության խնդիրներ ունեցողների հետ.
Վերաբերվել նրանց ինչպես իրենց հավասարի` հարգելով նրանց արժանապատվությունը.
- բացառելով բռնության, չարաշահման, ծաղրական վերաբերմունքի և խտրականության որևիցե դրսևորում
- հնարավորություն ապահովելով ինքնուրույնության, հասարակության մեջ ինտեգրման և ընդհանուր ներառման, ինչպես նաև քաղաքականության ձևավորման գործում մասնակցության համար:
-Մենք մշտապես պատրաստակամ ենք եղել գործակցել բոլոր կառույցների հետ` վերոնշյալ խնդիրների լուծման գործում և մեկ անգամ ևս հաստատում ենք այդ պատրաստակամությունը` համագործակցել հոգեկան առողջության ոլորտի վերաբերյալ ընդունված որոշումների իրականացման, ինչպես նաև նոր քաղաքական, իրավական փաստաթղթերի նախապատրաստման գործում.
-Որպես երկու երկրների հոգեկան առողջության ոլորտի մասնագիտական կազմակերպություններ` հայտարարում ենք նաև համագործակցության առավել սերտացման մասին` ի նպաստ հոգեկան առողջության արժանապատիվ պահպանման: