Դեկտեմբերի 6-ի Սահմանադրության հանրաքվեն կազմակերպվելու և անցկացվելու է Ընտրական օրենսգրքի ու հանրաքվեի մասին օրենքի պահանջներին լիակատար համապատասխան: Այսօր կենտրոնական ընտրական հանձնաժողովում Սահմանադրության փոփոխությունների 2015 թվականի դեկտեմբերի 6-ի հանրաքվեի նախապատրաստման եւ անցկացման հիմնական միջոցառումների ժամանակացույցի հաստատումից հետո լրագրողներին ասաց հանձնաժողովի նախագահ Տիգրան Մուկուչյանը:
Հարցին՝ ինչպե՞ս եք վերաբերում Վենետիկի հանձնաժողովի հորդորին հանրաքվեն ազատ, արդար, թափանցիկ անցկացնելու վերաբերյալ, Տիգրան Մուկուչյանը շարունակեց. «Այս հարցում մեր մոտեցումը մեկն է: Ինչպես նախորդ ընտրությունները, այնպես էլ հանրաքվեն, կազմակերպվելու են և անցկացվեն Ընտրական օրենսգրքի ու հանրաքվեի մասին օրենքի պահանջներին լիակատար համապատասխան»:
Պարոն Մուկուչյանը նաեւ տեղեկացրեց, որ հանրաքվեի քարոզարշավը պաշտոնապես մեկնարկում է այսօր ու Ընտրական օրենսգրքի և հանրաքվեի մասին կանոնակարգումներին համապատասխան սահմանվել են բոլոր գործառույթները՝ գործընթացը պատշաճ անցկացնելու համար:
«Ի տարբերություն համապետական ընտրությունների, հանրաքվեն ավելի լավ հնարավորություններ ունի քարոզարշավ անցկացնելու համար: Եթե համապետական ընտրությունների ժամանակ կա թեկնածուների առաջադրման, գրանցման փուլ, ապա հանրաքվեի ժամանակ ամրագրվում է քարոզարշավի մեկնարկ՝ հրամանագրի անմիջապես ուժի մեջ մտնելուց հետո: Մյուս առանձնահատկությունը Հանրային հեռուստատեսության եթերաժամանակն է: Ընտրությունների ժամանակ եթերը քարոզչության ամբողջ ժամանակահատվածի համար է տրամադրվում, իսկ հանրաքվեի ժամանակ՝ անվճար և վճարովի եթերաժամանակը քվեարկության օրվանից երեսուն օր առաջ է տրամադրվում»:
Կարդացեք նաև
Արփինե ՍԻՄՈՆՅԱՆ
