«Երբ երիտասարդ էի եւ կարդում էի Եվրոպական դատարանի վճիռները, բոլորին ասում էի, որ հատկապես 15-20 տարի առաջ ընդունված վճիռները իրավաբանի համար կարող են հնչել որպես աստվածաշունչ»,- հոկտեմբերի 10-ին ՀՀ Սահմանադրության ընդունման 20-ամյակին եւ ՀՀ սահմանադրական դատարանի ստեղծման 20-ամյակին նվիրված Երևանյան 20-րդ միջազգային խորհրդաժողովի ընթացքում ասաց սահմանադրական դատարանի դատավոր Վլադիմիր Հովհաննիսյանը:
Նա նկատեց, որ վերջին տարիներին տեղի ունեցող տարաբնույթ իրադարձությունների արդյունքում Մարդու իրավունքների Եվրոպական դատարանը վերջին տարիներին սուբյեկտիվիզմ է դրսեւորում, հատկապես՝ Ռուսաստանի Դաշնության նկատմամբ. «Մենք կարող ենք վկայել, որ Փերինչեքի գործով Եվրոպական դատարանը ընդունեց մի որոշում, որը ես կարող եմ մեկ նախադասությամբ ձեւակերպել՝ խայտառակ որոշում, սուբյեկտիվ որոշում: Կարծում եմ Հայաստանի իրավաբանները կանդրադառնան այդ վճռին , հատկապես՝ վերլուծությանը, բայց ասել, թե իդեալական, օբյեկտիվ է Եվրոպական դատարանը, ես ձեռնպահ կմնամ»:
Վլադիմիր Հովհաննիսյանը նշեց, որ Մարդու իրավունքների Եվրոպական դատարանի սուբյեկտիվությունը միջազգային կյանքի քաղաքական արտացոլումը, հայելին է. «Վերջերս Եվրոպական դատարանը ընդունեց հայտնի Փերինչեքի գործը, որն առնչվում էր Հայոց ցեղասպանության հիմնախնդրին եւ այդ վճիռը վկայում է, որ Եվրոպական դատարանի անկախությունը, օբյեկտիվությունը լիովին կասկածի տակ է գտնվում»:
Ամի ՉԻՉԱԿՅԱՆ
Կարդացեք նաև