Ազգային ժողովում նոյեմբերի 3-ին Տարածքային կառավարման և Ֆինանսավարկային ու բյուջետային հարցերի հանձնաժողովների համատեղ նիստում քննարկվում էր համայնքների 2016 թվականին բյուջեն:
Ինչպես արդեն տեղեկացրել էինք, նիստին ներկա էր նաեւ Սյունիքի մարզպետ Սուրիկ Խաչատրյանը: Նրա զեկույցից հետո ԱԺ պատգամավոր Նիկոլ Փաշինյանը կրկին իր հարցերն ուղղեց: Պատգամավորի առաջին հարցը Սյունիքի մարզում հացի գների մասին էր: Նա նկատեց, որ Սյունիքի մարզում հացի գներն ավելի բարձր են, քան հանրապետության այլ վայրերում, եւ Սյունիքի մարզպետը հունվար ամսին խորհրդակցություն է անցկացրել եւ որոշում է կայացրել հացի գները 40 դրամով նվազեցնելու մասին: Սակայն սեպտեմբերի տվյալներով՝ Սյունիքի մարզում հացի գինը բարձրացել է. «Ինչո՞վ կբացատրեք սա, որ Դուք մի կողմից ավետում եք, որ հացի գները նվազում են, բայց իրականությունը ցույց է տալիս, որ հացի գները աճում են: Եվ եթե դժվար չէ, բացատրեք խնդրեմ՝ այդ ի՞նչ մեխանիզմներով է մարզպետը կարգավորում հացի գները, այսինքն՝ պետական բյուջեից սուբսիդավորվո՞ւմ է հացի գինը, թե՞ ոչ»:
Երկրորդ հարցը մարզպետի գիտական գործունեության մասին էր. «Կարո՞ղ եք ասել, շարունակելո՞ւ եք արդյոք Ձեր գիտական գործունեությունը, մասնավորապես՝ քանի որ բյուջեն ենք քննարկում, հնարավո՞ր է, որ առաջիկայում մենք տեսնենք այսպիսի վերնագրով աշխատություն՝ «Պետական բյուջեի նախագծերը Սյունիքում հնագույն ժամանակներից մինչեւ մեր օրերը», եւ այս աշխատության շրջանակներում պատրաստվո՞ւմ եք արդյոք պայքարել Գիտությունների ազգային ակադեմիայի ակադեմիկոսի կոչման համար»:
Կարդացեք նաև
Սուրիկ Խաչատրյանը ասաց. «Պարոն Փաշինյան, քանի որ Ձեր հարցերը վարման կարգից դուրս են, Ձեր հարցերին չեմ պատասխանում»:
Նիստի ավարտից հետո Սյունիքի մարզպետը հայտարարեց, թե լրագրողների հարցերին չի պատասխանի: Բայց այնուամենայնիվ, հարցին, թե ինչո՞ւ չպատասխանեց Նիկոլ Փաշինյանի հարցին, նա ասաց. «Դեմագոգների հարցերին չեմ պատասխանում»:
Հարցին, թե ինչո՞ւ են մարզպետի ընտանիքի անդամները միշտ աղմկահարույց միջադեպերի կենտրոնում հայտնվում, մարզպետը լրագրողներին ասաց. «Գնացե՛ք ձեր գործերին»:
Ամի ՉԻՉԱԿՅԱՆ
