Շոկոլադի հարուստ համով այս տորթը վրայից ամբողջովին պատվում է ճերմակ (կամ վարդագույն) կրեմով, եւ միայն կտրելուց հետո է անսպասելիորեն բացվում նրա «սեւ սիրտը»: Շատ հեշտ պատրաստվող եւ շատ համեղ թխվածք է, որի զարդարման հարցում կարող եք դիմել ձեր երեւակայությանը:
Անհրաժեշտ մթերքները
Խմորի համար
Շաքարավազ- 1 ¾ բաժակ (գրեթե 2 բաժակ)
Կարդացեք նաև
Ալյուր- 1 ¾ բաժակ (նույնքան, որքան շաքարավազը)
Կակաոյի փոշի-4 ճաշի գդալ
Սոդա- 1,5 թեյի գդալ
Աղ-0,5 թեյի գդալ
Ձու- 2 հատ
Կաթ-1 բաժակ
Շատ թունդ սեւ սուրճ (ցանկալի է՝ ֆիլտրված)-0,5 բաժակ կամ 2 սուրճի բաժակ
Բուսական անհոտ յուղ (օրինակ՝ ռաֆինացված արեւածաղկի կամ եգիպտացորենի յուղ)- 0,5 բաժակ
Վանիլի մզվածք (էքստրակտ)- 1 ճաշի գդալ (եթե չունեք՝ 1 տուփ վանիլի փոշի)
Զարդարելու համար
Որեւէ ջեմ (ազնվամորու,ելակի, հապալասի,սեւ հաղարջի, ծիրանի, նարնջի եւ այլն՝ ըստ ձեր ճաշակի)- 1 բաժակ
Բարձր յուղայնության (30%-ից ոչ պակաս սերուցք)- 1 բաժակ
Շաքարի փոշի- 4 ճաշի գդալ
Վանիլի մզվածք- 1 ճաշի գդալ
Պատրաստման եղանակը
Սկզբում մեծ թասի մեջ լցրեք բոլոր չոր բաղադրիչները՝ շաքարավազը, ալյուրը, կակաոյի փոշին, աղը,սոդան: Լավ խառնեք: Ապա միանգամից ավելացրեք հեղուկ բաղադրիչները՝ ձուն, կաթը, սուրճը, բուսայուղը, վանիլի մզվածքը: Բնականաբար,եթե փոշի վանիլ եք օգտագործում, այն պետք էր ավելացնել չոր բաղադրիչների վրա:
Լավ խառնեք:Ստացվում է սովորական բիսքվիթի խմորից ավելի ջրիկ խմոր՝ նրբաբլիթների խմորի նման: Լցրեք ջեռոցի թավայի մեջ եւ դրեք նախապես 180 աստիճանով տաքացրած ջեռոցը: Առնվազն կես ժամ պետք է եփվի: Կես ժամը լրանալուց հետո փայտե չոփիկով ստուգեք, եթե չոփիկը չոր դուրս գա տորթի մեջտեղի հատվածից, անջատեք ջեռոցը, հակառակ դեպքում՝ թողեք եւս 10-15 րոպե եփվի: Ջեռոցից հանեք անջատելուց 10 րոպե անց, շուռ տվեք ջեռոցի ցանցի վրա:
Երբ խմորն ամբողջապես սառած կլինի, մեջտեղից կիսեք երկու մասի: Մի մասի վրա առատորեն քսեք ջեմը, ծածկեք մյուսով:
Սերուցքը լավ հարեք, երբ արդեն լավ պնդացած լինի, ավելացրեք շաքարի փոշին եւ վանիլի մզվածքը կամ վանիլի փոշին, շարունակեք հարել: Եթե չեք ուզում ճերմակ լինի կրեմը, կարող եք ձեր օգտագործած ջեմից 1-2 ճաշի գդալ ավելացնել: Ինձ մոտ օրինակ հապալասի-ազնվամորու ջեմ էր, որից կրեմը նուրբ վարդագույն երանգ ստացավ:
Կրեմով պատեք տորթը եւ զարդարեք ըստ ցանկության:
Դրեք սառնարան առնվազն 2 ժամով, ապա մատուցեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
«Առավոտ» օրաթերթ
21.11..2015
