Սիրիահայ և հայաստանցի արվեստագետների մասնակցությամբ տեղի ունեցավ «Կոչեմ ապրողաց» խորագրով համերգը

Նոյեմբերի 24-ին Կոմիտասի անվան կամերային երաժշտության տանը ՀՀ սփյուռքի նախարարության և «Հալեպ» հայրենակցական բարեսիրական հասարակական կազմակերպության համատեղ նախաձեռնությամբ տեղի ունեցավ «Կոչեմ ապրողաց» խորագրով համերգը: Սիրիահայ և հայաստանցի արվեստագետների մասնակցությամբ համերգը նվիրված էր Հայոց ցեղասպանության 100-րդ տարելիցին:

Միջոցառմանը ներկա էին ՀՀ սփյուռքի նախարարի տեղակալ Վահագն Մելիքյանը, նախարարության աշխատակազմի ղեկավար Ֆիրդուս Զաքարյանը, մտավորականներ, հյուրեր՝ Հայաստանից և Սփյուռքից:

Դեյր Զորի մասին պատմող ֆիլմի հատվածներին զուգահեռ՝ սիրիահայ երգիչներ և երաժիշտներ Անի Մոմճյանը, Ցոլեր Կարագուլյանը, Պերճ Քարազյանը, Պողոս Բեյազբեկյանը, Հակոբ Ֆաքճյանը, Շահե Քեշիշյանը հանդես եկան Կոմիտասի և այլ հայ հեղինակների կատարումներով:

Հանդիսատեսը հնարավորություն ունեցավ նաև ֆիլմում լսելու 102-ամյա Ներսես Այվազյանին: Ներսես պապը թոռներին էր  պատմում էրգրից բերած լուսանկարների պատմությունը:

Համերգի ավարտին ՀՀ սփյուռքի նախարարության աշխատակազմի ղեկավար Ֆիրդուս Զաքարյանն  ընթերցեց  նախարար Հրանուշ Հակոբյանի ողջույնի խոսքը, որում մասնավորապես նշված էր. «Շնորհակալ ենք Ձեզ, որ, չնայած բազմաթիվ արհավիրքներին, շարունակում եք ստեղծագործել՝ պահպանելով սիրիահայ մշակույթի լավագույն ավանդույթները, շարունակում եք ապրել ու արարել՝ հարստացնելով և զարգացնելով հայկական մշակույթը: Օսմանյան Թուրքիայում նախապես ծրագրված և պետական մակարդակով կազմակերպված կոտորածի հետևանքով ցեղասպանվեց և հայրենազրկվեց մի ամբողջ ժողովուրդ: Ազգի մի ստվար հատված դարձավ աշխարհասփյուռ: Դեյր Զորի ճանապարհով Սիրիա հասած մեր հայրենակիցները չընկրկեցին, չհաձնվեցին, այլ հառնեցին ինչպես փյունիկ` ապացուցելով, որ ոչ մի եղերագործություն չի կարող ընկճել Հայի կենսասեր ոգին»:

Ֆ.Զաքարյանը նշեց, որ հայ ժողովուրդը մշտապես անսահման երախտագիտությամբ է հիշելու արաբ ժողովրդի ցուցաբերած անուրանալի աջակցությունը: «Պատմության խաղացած հերթական չար կատակի հետևանքով սիրիահայությունը կրկին բռնեց գաղթի ճամփան, սակայն այս անգամ արդեն այդ ճանապարհը բերեց Մայր հայրենիք՝ մեկ անգամ ևս հաստատելով ապրելու ու արարելու մեր դարավոր ձգտումն ու իրավունքը», – նշեց նա:

ՀՀ ՍՓՅՈՒՌՔԻ ՆԱԽԱՐԱՐՈՒԹՅՈՒՆ

ՄԱՄՈՒԼԻ ԵՎ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ՎԱՐՉՈՒԹՅՈՒՆ