Լրահոս
Օրվա լրահոսը

Վարշավայում բացվել է «Հայերը Ռեչպոսպոլիտային ծառայելիս» խորագրով ցուցահանդես

Նոյեմբեր 24,2015 23:00

Նոյեմբերի 20-ին Վարշավայի Բանակի թանգարանում տեղի է ունեցել «Հայերը Ռեչպոսպոլիտային ծառայելիս» խորագրով ցուցահանդեսի բացման հանդիսավոր արարողությունը: Ցուցահանդեսը կազմակերպել էր Հայկական հիմնադրամը՝ Լեհաստանում ՀՀ դեսպանության հովանու ներքո:

Ցուցահանդեսի բացման պաշտոնական արարողությանը ներկա էին Լեհաստանում ՀՀ դեսպան Էդգար Ղազարյանը, Լեհաստանի Հանրապետության պատերազմի վետերանների և բռնադատվածների գրասենյակի ղեկավար, նախարար Յան Ստանիսլավ Չեխանովսկին, Լեհաստանի զինված ուժերի ներկայացուցիչներ, բարձրաստիճան սպաներ, ցուցահանդեսում ներկայացված գործիչների ժառանգներ և հարազատներ, դիվանագետներ, Լեհաստանի հայ համայնքի ներկայացուցիչներ, լրագրողներ, թանգարանի այցելուներ:

Ցուցահանդեսի բացման արարողությանը ելույթներով հանդես եկան Լեհաստանում ՀՀ դեսպան Էդգար Ղազարյանը, Լեհաստանի Հանրապետության պատերազմի վետերանների և բռնադատվածների գրասենյակի ղեկավար Յան Ստանիսլավ Չեխանովսկին, Վարշավայի բանակի թանգարանի տնօրեն Զբիգնև Վավեռը, Հայկական հիմնադրամի նախագահ Մարթա Աքցենտովիչ-Բողոսևիչը:

Դեսպան Ղազարյանն իր ելույթում, մասնավորապես, նշեց. «Հայ ժողովուրդն իր հազարամյա պատմության ընթացքում բազում անգամներ ստիպված է եղել պայքարել իր անկախության և ազատության համար: Այդ պայքարներում են ծնվել մեր ժողովրդի այն հերոսական զավակները, որոնց սխրանքների արդյունքն այսօրվա Անկախ Հայաստանի Հանրապետությունն ու Ազատ Արցախն է: Սակայն հայերը ոչ միայն պայքարել են իրենց ազատության և անկախության համար, այլ մասնակցություն են բերել համաշխարհային անվտանգության ապահովմանը, այլ ժողովուրդների խաղաղության կերտմանը: Շատերին է հայտնի հայ ժողովրդի քաջարի զավակների հերոսական մասնակցությունը Երկրորդ համաշխարհային պատերազմին ոչ միայն Խորհրդային Միության, այլև դաշնակից պետությունների զորքերի կազմում: Այսօր մենք ներկա ենք մի ցուցահանդեսի բացման, որը ներկայացնում է հայերի նվիրական ծառայությունը Լեհաստանին, դրա պաշտպանությանն ու անվտանգությանը»:

Վարշավայի բանակի թանգարանում բացված ցուցահանդեսը կգործի մինչև 2015 թվականի նոյեմբերի 27-ը՝ հնարավորություն տալով թանգարանի բոլոր այցելուներին ծանոթանալ նաև Լեհաստանի ծառայություններ մատուցած հայ զինվորականների անցյալին և գործունեությանը:

ՀՀ ԱԳՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Նոյեմբեր 2015
Երկ Երե Չոր Հնգ Ուրբ Շաբ Կիր
« Հոկ   Դեկ »
 1
2345678
9101112131415
16171819202122
23242526272829
30