Ուսումնական հաստատություններում դեկտեմբերի 6-ի հանրաքվեի քարոզչության մասին միայն մեկ դեպք է հաստատվել, որի հետ կապված համապատասխան վարչական վարույթ է իրականացվել: Այս մասին այսօր ԱՀԹ առաջնորդարանում լրագրողների հետ զրույցում ասաց Կրթության եւ գիտության նախարարը: Արմեն Աշոտյանը նշեց, որ մյուս դեպքերի մասին տեղեկատվությունն անգրագիտության հետեւանք է. «Որոշ լրատվամիջոցներ գրեցին, որ շաբաթ օրով Վանաձորի թիվ 3 դպրոցում քարոզչական հավաք է եղել: Այո, եղել է, բայց անգրագիտություն է այդ հավաքը դիտարկել որպես ապօրինի, քանի որ ԿԸՀ-ն սահմանել է դահլիճների ցանկ, որտեղ «այո»-ները եւ «ոչ»-երը կարող են անվճար հանդիպումներ ունենալ: Եթե լրագրողն ուզում է լուրջ լուսաբանել քարոզարշավը, պետք է ծանոթ լինի ԿԸՀ-ի տարրական որոշումներին»:
Արմեն Աշոտյանի խոսքով. «Տասնյակ դպրոցներ ներգրավված են ԿԸՀ-ի արտոնյալ դահլիճների ցանկում: Այդտեղ «այո»-ի եւ «ոչ»-ի հավաքներն օրինական են: Ապօրինի են այն հավաքները, որոնք իրականացվում են այդ ցանկում չեղած հաստատություններում կամ դասերի հաշվին»:
Նախարարն ասաց, որ «ոչ»-ի՝ ապօրինի քարոզչություն անելու փորձերն ավելի շատ են. «Տարբեր քոլեջներում փորձել են «ոչ»-ի հետ կապված թռուցիկներ բաժանել, ինչը կանխվել է: Նույն բանը փորձել են անել եւս երեք բուհերում, օրինակ՝ ԵՊՀ-ում, Թերլեմեզյանի քոլեջում: Տնօրենները կանխել են»:
Ավելի վաղ մեզ հետ զրույցում Վանաձորի համալսարանի ռեկտորը հերքեց, որ «Այո» է քարոզել:
Լուիզա ՍՈՒՔԻԱՍՅԱՆ
