Ճապոնական ֆիլմերի փառատոնը Հայաստանում այս տարի կանցկացվի նոյեմբերի 27-ից դեկտեմբերի 1-ը: Այդ ընթացքում կցուցադրվեն ճապոնական հինգ ֆիլմեր՝ «Waterboys», «Նրբագեղ բառերի պարտեզը», «Երկաթուղային բեռնատար», «Նաբիի սերը» և «Կյանքն Ագա գետի վրա»:
Փառատոնի կազմակերպիչները ՀՀ-ում Ճապոնիայի դեսպանությունը և հայ-ճապոնական «Հիկարի» գիտամշակութային կենտրոնն են:
Հայաստանում Ճապոնիայի արտակարգ և լիազոր դեսպան Էյջի Տագուչիի խոսքով՝ այդ ֆիլմերը, որոնք բոլորն էլ ժամանակակից գործեր են, բավականին բարձր են գնահատվել Ճապոնիայում:
Կարդացեք նաև
«Հուսով եմ՝ ֆիլմերի միջոցով հայերն ավելի լավ կճանաչեն Ճապոնիան, նրա մշակույթն ու բնակիչներին»,- այսօր լրագրողների հետ հանդիպման ժամանակ ասաց դեսպանը:
Նրա խոսքով՝ Ճապոնիայի դեսպանատունը ցանկանում է մշակութային այլ միջոցառումներ ևս անցկացնել՝ այդպիսով ավելի ամրապնդելով երկկողմ մշակութային կապերը: Դրանցից մեկը, օրինակ, նախատեսում են կազմակերպել հաջորդ տարվա հունվարին: Կինոփառատոն է լինելու, գլխավոր թեման՝ կինը:
«Հիկարի» կենտրոնի նախագահ Կարինե Փիլիպոսյանի տեղեկացմամբ՝ այս տարվա փառատոնի շրջանակներում ճապոնական ֆիլմերի ցուցադրություններ կլինեն ոչ միայն Երևանում, այլև Գյումրիում և Էջմիածնում:
Ֆիլմերը դիտողին կներկայացվեն ճապոներենով՝ ռուսերեն ենթագրերով:
Ինչպես ամեն տարի, այս տարի ևս, կինոփառատոնի մուտքն ազատ է լինելու: Կինոդիտումներից բացի, կիրականացվեն նաև մշակութային այլ միջոցառումներ:
Սիրանուշ ՀԱՅՐԱՊԵՏՅԱՆ
