«Ռուսաստանի ազդեցությունը ՀՀ քաղաքական որոշումների վրա ակնհայտ ու որոշիչ է: Եթե Ռուսաստանը շարունակի այդ ագրեսիվ ու միջազգային անվտանգության կանոններին հակասող դիրքորոշումը, Հայաստանը կարող է ընկալվել որպես ռուսական թիրախ, որովհետեւ մենք պետություն ենք, որի տարածքում կա ռուսական բազա… հայ-թուրքական սահման այդպես էլ չունեցանք, այն դե ֆակտո շարունակվում է մնալ ռուս-թուրքական սահման, այն կարող է դառնալ նաեւ առճակատման սահման Արեւմուտք-Ռուսաստան հակամարտության ժամանակ»,- այս կարծիքին է իրավապաշտպան Արթուր Սաքունցը:
Նրա խոսքով, ռուս-թուրքական հարաբերությունների լարվածությունն արդեն կա, ինչը կարող է Ասադի ռեժիմի դեմ միջազգային կոալիցիայի եւ ՌԴ հարաբերությունների սրմանը հանգեցնել:
Արթուր Սաքունցի խոսքով, այն տարածքում, որտեղ ռուսական ռազմական օդանավերը թռիչքներ էին կատարում, այդտեղ հակաասադական կոալիցիային աջակցող ուժեր էին բնակվում՝ թուրքմենները. «Այդ հարցը բարձրացվել էր Թուրքիայի կողմից ՄԱԿ-ի անվտանգության խորհրդում եւ ՆԱՏՕ-ում: Կարծես թե Ռուսաստանը, հաշվի չառնելով այդ քայլերը, ինքնուրույն սկսեց գործողություններ իրականացնել, ու ինքնուրույն գործողությունները ստացան պատասխան: ՌԴ-ն ակնհայտորեն աջակցում է Ասադի ռեժիմին եւ հիմա իր այդ քաղաքականության հետեւանքներն է կրում»:
Արփինե ՍԻՄՈՆՅԱՆ
