Այսօր Վարչական դատարանում պետք է քննվեր ՀՀ ճանապարհային ոստիկանության հայցն ընդդեմ ՀՀԿ-ական պատգամավոր Սեդրակ Սարոյանի: Սեպտեմբերի 23-ին, Ճանապարհային ոստիկանությունը հայցադիմում է ներկայացրել դատարան`Սեդրակ Սարոյանից հօգուտ ՀՀ ոստիկանության «Ճանապարհային ոստիկանության» ծառայության 500.000 դրամ գանձելու համար:
Նիստն այսօր չկայացավ: Ոչ ոստիկանության ներկայացուցիչը, ոչ էլ պատգամավորի ներկայացուցիչը չէին ներկայացել դատարան: Դատավոր Հրաչ Այվազյանը, սակայն, որոշել է, որ ճանապարհային ոստիկանության հայցադիմումը ենթակա է մերժման:
Ըստ որոշման, եթե քաղաքացուն ներկայացված պահանջը գերազանցում է հարյուր հազարը, ՀՀ վարչական դատավարության օրենսգրքի եւ մի շարք այլ ակտերի հիման վրա, «…ֆիզիկական անձից հանրային իրավական դրամական պահանջներով նախատեսվող գումարի բռնագանձման պահանջով դատարան դիմելու համար անհրաժեշտ և կարևոր պայման է բռնագանձման պահանջի հիմքում դրված վարչական ակտի անբողոքարկելի լինելը, ինչի մասին տեղեկությունը նշվում է ներկայացված հայցադիմումում, իսկ այն դեպքում, երբ բռնագանձման պահանջի հիմքում դրված վարչական ակտը չի դարձել անբողոքարկելի, ապա վարչական մարմինները կամ պաշտոնատար անձինք չեն կարող նման պահանջներով հայց ներկայացնել, իսկ ներկայացնելու դեպքում դրանք ենթակա են վերադարձման»:
Նելլի ԳՐԻԳՈՐՅԱՆ
