Ի տարբերություն երեկվա, երբ ոստիկանական հսկա ուժեր էին կենտրոնացվել Գյումրիում, խուզարկություններ էին կատարվում, ամեն քայլափոխի կանգնեցնում էին մեքենաները, անգամ միկրոավտոբուսներն, այսօր վիճակը հանգիստ է: Փողոցներում կանգնած ոստիկաններ գրեթե չկան, նրանց կարելի է հանդիպել միայն ոստիկանության շենքերի դիմաց, օրինակ` ոստիկանության «Կումայրի»-ի բաժնի շենքի դիմաց հսկողություն են իրականացնում զինված ոստիկանները, Անի թաղամասում գտնվող ոստիկանության «Գյումրի պահպանության բաժնի դիմաց» մեծ թվով ոստիկաններ են կանգնած՝ առավոտից մինչ այս պահը:
Կեսօրին մի քանի ոստիկաններ հսկում էին Շիրակի մարզպետարանի տարածքը: Իհարկե, մենք պարզեինք, որ այստեղ այսօր բողոքի ակցիա էր եղել: Հացիկ գյուղի տղամարդիկ լցվել էին մարզպետարան՝ սահմանադրական հանրաքվեի նախօրեին պահանջելով կարգի բերել գյուղ տանող ճանապարհը: Ոստիկանները նրանց հետ զրույցի էին բռնվել, ամենայն հավանականությամբ համոզելու, որ այս օրերին գործ չունենան հրապարակային բողոքի ակցիաների հետ:
Ինչեւէ, շրջայց էինք կատարում Գյումրու տարբեր փողոցներում՝ պարզելու, թե ինչպիսի վիճակ է, կեսօրին գյումրեցիներից ահազանգ ստացանք, որ ոստիկանները շրջափակել են Ջիվանու ու հարակից փողոցները: Ըստ ահազանգողների, քաղաքի այս հատվածը երկու կողմերից փակ է, չեն թույլատրում մեքենաները ներս մտնեն: Նշենք, որ այս հատվածում է բնակվում Գյումրու քաղաքապետ Սամվել Բալասանյանը, այստեղ է նաեւ նրա գարեջրի գործարանը, «Պոլոզ Մուկուչ» պանդոկը: Մի՞թե այստեղ եւս հակահաբեկչական խուզարկություն է կատարվում, հիմա ո՞ւմ են կասկածում, այս հարցով դիմեցինք Շիրակի մարզային ոստիկանություն: Այստեղից պարզաբանեցին, որ քաղաքի այս հատվածում նկարահանումներ են, կինո են նկարահանում՝ նվիրված երկրաշարժի թեմային:
Ըստ ոստիկանության, մի քանի օր առաջ նկարահանումներ են եղել շուկայի տարածքում, այնտեղ եւս փակել են տարածքը ու հսկողություն սահմանել: Գյումրու տարբեր թաղերում նկարահանումներ են եղել: Այնպես որ Գյումրու քաղաքապետի փողոցում ահաբեկիչներ չեն փնտրում:
Կարդացեք նաև
Նունե ԱՐԵՎՇԱՏՅԱՆ
