Վերջին շրջանում Հայաստանում էլ է սկսել մեծ տարածում գտնել շատ յուրահատուկ համով ռուկոլա կանաչին, որը ոչ միայն շատ համեղ է՝ իր ինքնատիպ տտիպությամբ, այլեւ չափազանց օգտակար: Միջերկրածովյան երկրների խոհանոցում ռուկոլան հաստատուն տեղ ունի, այն օգտագործվում է բազմաթիվ աղցանների մեջ: Ի դեպ, այդ կանաչին շատ հեշտ է աճեցնելը սերմերով, այն ամենեւին քմահաճ բույս չէ, շատ արագ բազմանում է, ցրտադիմացկուն է: Եթե ունեք հնարավորություն, անպայման փորձեք, եւ մշտապես, տարվա գրեթե բոլոր եղանակներին այդ օգտակար բույսը կզարդարի ձեր սեղանը: Ռուկոլան կարելի է ավելացնել գրեթե բոլոր այն աղցանների մեջ, որոնցում սալաթի տերեւներ են նախատեսված: Թեեւ կան մարդիկ, որոնք այնքան էլ չեն հավանում այս կանաչու համը, բայց նրանք էլ, իմանալով ռուկոլայի օգտակար հատկությունների մասին, դեմ չեն լինի փորձել այս աղցանը: Ի վերջո, եթե չգտնեք ռուկոլա, կարող եք այն փոխարինել հազարաթերթիկի տերեւներով, կամ պարզապես դրա փոխարեն առատորեն համեմ եւ մաղադանոս կտրատեք:
Անհրաժեշտ մթերքները
Կարմիր ճակնդեղ (բազուկ)- 0,5 կգ
Սխտոր- 3-4 պճեղ
Կարդացեք նաև
Կարմիր թարմ պղպեղ- 7-8 հատիկ
Ֆետա տեսակի պանիր- 200 գրամ
Բալզամիկ քացախ- 3 ճաշի գդալ
Ձիթապտղի յուղ- 4 ճաշի գդալ
Արեւածաղկի սերմեր- 2 ճաշի գդալ
Սեւ եւ սպիտակ քունջութ- 3-ճաշի գդալ
Աղ եւ սեւ պղպեղ՝ ըստ ճաշակի
Պատրաստման եղանակը
Ճակնդեղը լավ լվացեք: Առանց կեղեւահանելու՝ դրեք փայլաթիթեղի մեջ, կողքը դրեք սխտորի պճեղները՝ կրկին առանց մաքրելու, լավ փաթաթեք փայլաթիթեղով եւ գրեթե մեկ ժամով դրեք ջեռոցը: Եթե ճակնդեղները փոքր են, կես ժամն էլ բավարար է: Պատրաստ լինելը ստուգեք փայտե չոփիկը մեջը խրելով, եթե հանգիստ մտնում-դուրս է գալիս, կարող եք հանել ջեռոցից:
Ջեռոցից հանելուց հետո ազատվեք ճակնդեղի կեղեւից, ապա այն կտրատեք երկար-բարակ ձողիկների տեսքով: Սխտորը, որն արդեն չափազանց փափուկ կլինի՝ խյուսի նման, խառնեք բալզամիկ քացախի եւ ձիթայուղի հետ, լցրեք ճակնդեղի վրա: Ըստ ճաշակի աղ եւ սեւ պղպեղ արեք ու թողեք մի քանի ժամից մինչեւ երկու օր՝ մարինացվելու համար:
Կարմիր պղպեղները խորովեք եւ մաքրեք կեղեւից ու կորիզներից, կտրատեք երկար-բարակ կտորներով: Մեծ աղցանամանի մեջ լցրեք լվացած եւ լավ չորացրած ռուկոլան, վրան լցրեք խորոված պղպեղի կտորները, ապա՝ բազուկը եւ արեւածաղկի սերմերը: Լավ խառնեք:
Թավայի մեջ լավ տաքացրեք քունջութը, բայց չթողնեք վառվի, մեկ-երկու րոպեն բավական է: Տաք քունջութի մեջ թաթախեք քառակուսի կտրատած ֆետա պանիրը: Աղցանի վրա շարեք քունջութապատ պանրի կտորները եւ մատուցեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
«Առավոտ» օրաթերթ
26.11..2015
