«Մեդիա կենտրոնում» տեղի ունեցած «Սահմանադրական փոփոխություններ. դեմ և կողմ» թեմայով քննարկման ժամանակ ՀՀ ԱԺ «Բարգավաճ Հայաստան» կուսակցության պատգամավոր Վահան Բաբայանն ասաց, որ դեկտեմբերի 6-ին մարդիկ պետք է «Այո» ասեն սահմանադրական փոփոխություններին, քանի որ այս փոփոխություններից հետո.
1. Իշխանության գերկենտրոնացվածությունը կվերանա եւ հակակշիռներ կձեւավորվեն, 2.անկախ դատական համակարգ կունենանք,
3. Ընդդիմության լծակները կմեծանան:
«Չեմ կարողանում պատկերացնել, թե ինչու պետք է դեմ լինել սրան: Ինչ պիտի լինի, որ դեմ լինեն: Ավելի քան վստահ եմ, որ շատ տեղերում մարդիկ այս փոփոխությունների համար են այո ասում: Չգիտեմ, թե ում համար է այս վիճակը լավ, որ «Ոչ» ասի»,- հայտարարեց Վահան Բաբայանը:
Կարդացեք նաև
Ի պատասխան «Չեք անցկացնի» նախաձեռնության անդամ, ՀԱԿ կուսակցության անդամ Արշակ Մուսախանյանը նկատեց, որ ընդդիմության լիազորությունները մեծացնելու մասին մտածելու պնդումը ամենաաբսուրդային կարծիքն է: «Ընդդիմությունը միշտ ուժեղ է, խնդիրը` ընտրական համակարգն է, ազատ, արդար, մրցակցային ընտրություն կազմակերպելը: Ինչ վատ ընտրություն էր եռյակը, ուր նաեւ ԲՀԿ-ն էր: Սրա հետ սահմանադրությունը կապ չունի: Նոր հնարավորություն պետք չի ընդդիմությանը: Եթե երկրում վերանում են հակակշիռները, կստեղծվի միակուսակցական համակարգ: Նման դեպքում որեւէ իրավունքի մասին խոսելը անհնար է: Կոչ եմ անում քվեարկել ոչ, սա իշխանության վերարտադրություն է», ասաց Մուսախանյանը:
Նելլի ԳՐԻԳՈՐՅԱՆ
Լուսանկարը՝ «Մեդիա» կենտրոնի
