ԱԺ էթիկայի հանձնաժողովն այսօր հրապարակելու է իր որոշումը`ԱԺ ՀՀԿ խմբակցության պատգամավոր Առաքել Մովսիսյանի (Շմայս) վարքագծի վերաբերյալ: ՀՀԿ խմբակցության պատգամավորը, հիշենենք, հայտարարել էր, որ «կգլխատի եւ կբռնաբարի» բոլոր նրանց, ովքեր ՀՀ պաշտպանության նախարար Սեյրան Օհանյանի եւ նրա ընտանիքի հասցեին ոչ վայել հայտարարություններ կանեն: Հելսինկյան քաղաքացիական ասամբլեայի գրասենյակի տնօրեն, իրավապաշտպան Արթուր Սաքունցն էլ դիմել էր ԱԺ էթիկայի հանձնաժողով`պարզելու համար արդյոք պատգամավորի կողմից նման հայտարարությունները համարժեք են հանձնաժողովի պատկերացումներին:
Արթուր Սաքունցը պատգամավորի սույն հայտարարությունները վիճարկել էր նաեւ դատական կարգով: ՀՀ դատական ատյանները պատգամավորի հայտարարության մեջ հանցակազմ չգտան:
Aravot.am-ի տեղեկություններով, ԱԺ էթիկայի հանձնաժողովը, սակայն, պատգամավորի հանդեպ այդքան բարեհաճ չի գտնվի, որքան դատական ատյանները: Հանձնաժողովի որոշմամբ`Առաքել Մովսիսյանն իր այդ հայտարարությամբ խախտել է ԱԺ կանոնակարգ-օրենքը: Թե հատկապես ո՞ր կետով`մեզ չհաջողվեց պարզել: Դա պարզ կդառնա հանձնաժողովի որոշումը հրապարակելուց հետո:
Հիշեցնենք, որ հանձնաժողովի որոշումները որեւէ գործնական, իրավական պատասխանատվություն չեն ենթադրում: Դրանք հասարակական պարսավանքի ոլորտից են, որից պատգամավորը պիտի հետեւություն անի: Հանձնաժողովի որոշումը ընդամենը կհրապարակվի ԱԺ լիագումար նիստում: Դատելով Առաքել Մովսիսյանի գործունեությունից`նա դժվար թե համապատասխան հետեւություններ անի:
Կարդացեք նաև
Նելլի ԳՐԻԳՈՐՅԱՆ
