ԲՀԿ խմբակցության ղեկավար Նաիրա Զոհրաբյանն այսօր այցելել է ցմահ ազատազրկվածների: Նրանցից 38-ը հացադուլ են հայտարարել եւ պատգամավորին ներկայացրել են իրենց պահանջը՝ ուզում ենք, որ 2011-ի մայիսի 25-ին Քրեական օրենսգրքում կատարված փոփոխությունները մտնեն ուժի մեջ:
Այս առնչությամբ Aravot.am-ի հետ զրույցում Նաիրա Զոհրաբյանն ասաց, որ ցմահ դատապարտվածների համոզմամբ, այդ փոփոխությունները նախատեսում են մեղմացում իրենց որոշակի հանցատեսակների համար. «Նրանք նաեւ բարձրացնում էին պայմանական վաղաժամկետ ազատ արձակման հանձնաժողովի խնդիրը: Հանձնաժողովի աշխատանքը մշտապես եղել է խիստ խնդրահարույց, ուստի դատապարտյալները պահանջում էին գործերի վերանայում: Ցմահների խնդրով զբաղվող կազմակերպությունները 10 կետից կազմված իրենց առաջարկները քանիցս ներկայացրել են ԱԺ, նաեւ մեզ: Մենք պարբերաբար խորհրդարանում այդ խնդրին անդրադառնում ենք: Կոնկրետ ինձ համար շատ կարեւոր է, որ անդրադարձ լինի բանակում պարտադիր զինվորական ծառայության ժամանակ զինվորների կողմից կատարված հանցագործություններին»:
Խորհրդարանի գարնանային նստաշրջանում քննարկվելու է նոր Քրեական օրենսգիրքը: Նաիրա Զոհրաբյանը դատապարտյալներին դրա հետ կապված որոշ խոստումներ է տվել՝ հորդորելով դադարեցնել հացադուլը. «Իրենց ակնկալիքը շարունակում է մնալ այն, որ թե՛ կառավարությունը, թե՛ խորհրդարանն իրենց խնդիրները պահեն ուշադրության կենտրոնում: Ես խոստացա այն, ինչ իրավասու էի եւ իմ հնարավորությունների սահմանում էր, ամեն ինչ անել, որ Քրեական նոր օրենսգրքում հստակ ձեւակերպումներ լինեն: Իրենք ասում էին, որ 2011-ի փոփոխություններով պատժի մեղմացում արդեն իսկ պիտի լիներ, եթե դա չի գործում, ի՞նչ երաշխիք կա, որ նոր Քրեական օրենսգիրքը, որը նաեւ պրոբացիոն ինստիտուտ է ներառելու, կգործի: Մենք այնքան հստակ պետք է լինենք ընդունվող փոփոխություններում, մեր ձեւակերպումներով, որպեսզի տարընթերցումների տեղիք չտա, որ ամեն մեկը ոնց ուզենա՝ մեկնաբանի: Եվ հետո ցմահ դատապարտվածների մեջ Հոկտեմբերի 27-ի գործով անցնող հրեշներն էլ կան: Մենք պետք է այնքան զգույշ լինենք նոր օրենսգրքում մեր ձեւակերպումներում, որ հաշվի առնենք նաեւ այդ հրեշների գործը»:
Մենք հետաքրքրվեցինք՝ Դուք տեսա՞ք Նաիրի Հունանյանին, նա այնտե՞ղ էր՝ Նաիրա Զոհրաբյանը պատասխանեց. «Նա այդ մեկուսարանում չէր, այլ մեկուսարանում էր պահվում: Ամռանը պատգամավորների հետ, երբ այցելել էինք դատապարտյալներին, ես ինքս չեմ եղել այն պատգամավորների մեջ, ովքեր այցելել են այդ հրեշին: Ես այդ հրեշին տեսնելու որեւէ ցանկություն չեմ ունեցել եւ երբեւէ չեմ ունենա»:
Կարդացեք նաև
Նաիրա Զոհրաբյանը հանդիպել է նաեւ Արմենակ Մնջոյանի, Արմեն Տեր-Սահակյանի հետ:
Նաիրա Զոհրաբյանն ասաց, որ հույս ունի, դատապարտյալներն այսօր կդադարեցնեն իրենց հացադուլը. «Համենայնդեպս, ինձ հետ զրույցում տպավորությունն այդպիսին էր»:
Հռիփսիմե ՋԵԲԵՋՅԱՆ
