Ի տարբերություն նախորդ օրերի՝ վերջին երկու օրերին սահմանին իրավիճակը համեմատաբար հանգիստ է եղել:
ՊՆ մամուլի խոսնակ Արծրուն Հովհաննիսյանի խոսքով. «Իրավիճակը կարելի է բնութագրել թույլ լարվածություն կամ լարվածության թուլացում»:
Մեր հարցին՝ ինչով է պայմանավորված լարվածության թուլացումը, պարոն Հովհաննիսյանն ասաց՝ նաեւ Ադրբեջանի ու Հայաստանի նախագահների վերջին հանդիպումն է նպաստել. «Միգուցե դիվանագիտական շփումներն էլ դերակատարում ունեցան, բայց պարզ է, որ շատ կարեւոր տեղում են հայկական զինված ուժերի պատասխան գործողությունները»:
Դիտարկմանը, թե կան քննադատություններ, որ հայկական կողմը ավելի զսպված գործողություններ է կատարում, ՊՆ խոսնակը ասաց. «Հայկական կողմը ադեկվատ գործողություններ է իրականացնում, քննադատել միշտ կարելի է»:
Կարդացեք նաև
Շաբաթվա կտրվածքով պարոն Հովհաննիսյանը նույնպես իրավիճակը համեմատաբար խաղաղ գնահատեց. «Հիմնական օրերին արդեն լիցքաթափում կար, անցնող շաբաթվա համեմատ բավականին թույլ»:
Մեր հարցին՝ կա՞ն նախադրյալներ, որ լարված իրավիճակի մեղմացումը կայուն կմնա, պատասխանեց. «Հույս ունենք, ուզում ենք այդպես լինի, բայց հստակ կանխատեսել դժվար է Ադրբեջանի դեպքում»:
Արփինե ՍԻՄՈՆՅԱՆ
