Գյումրիի բոլոր եկեղեցիներում երեկոյան ժամերգությամբ տոնվում է Հիսուս Քրիստոսի Սուրբ ծնունդը: Լուսանկարներում Գյումրու Անի թաղամասի «Սուրբ Հակոբ Մծբնեցի» ու «Սուրբ Յոթ վերք Աստվածածին» եկեղեցիներն են, որտեղ այս պահին կանգնելու տեղ անգամ չկա. չնայած այս քաղաքի սառցակալած ու դժվարանցանելի փողոցներին՝ ժողովրդի հոսքը դեպի եկեղեցի չի դադարում:
Հունվարի 5-ն այն եզակի տոներից է, երբ Գյումրին շունչ է առնում, գյումրեցիները մի մարդու պես տներից դուրս են գալիս, անկենդան փողոցները լուսավորվում են մոմի լույսերով:
Իսկ Գյումրու կենտրոնական Վարդանանց հրապարակում գտնվող «Սուրբ Յոթ վերք Աստվածածին եկեղեցում» Սուրբ Ծննդյան Ճրագալույցի Սուրբ Պատարագը մատուցվում է սիրված հոգեւորական, Շիրակի թեմի առաջնորդ Միքայել եպիսկոպոս Աջապահյանի հանդիսապետությամբ:
Կենտրոնական այս եկեղեցին բնականաբար առավել մարդաշատ է. հետաքրքիրն այն է, որ մոմ վաճառողներից շատերն այս սուրբ օրով իրենց թույլ չեն տալիս գին սակարկել, վաճառում են այնքանով, որքանով հարմար է բնակիչներին:
Կարդացեք նաև
Նունե ԱՐԵՎՇԱՏՅԱՆ
