«Կարծում եմ` անիմաստ է հակադրություն տեսնել Սուրբ Վալենտինի եւ Սուրբ Սարգսի տոների միջեւ: Որպես հոգեւորական, իմ իրավունքն է իմ ժողովրդին ասելու, որ պետք է պահել ազգային-եկեղեցականը: Եվ սա շատ բնական է: Վալենտինի տոնը մերը չէ, չենք ասում՝ լավն է, թե վատ: Ընտրությունը յուրաքանչյուրինն է: Մարդ ազատ է ընտրության հարցում, եկեղեցին չի պարտադրում նշել այս կամ այն տոնը»,-այսօր «Պոստ Սկրիպտում» մամուլի ակումբում ասաց Արարատյան հայրապետական թեմի տեղեկատվական բաժնի համակարգող Տեր Եսայի Քահանա Արթենյանը՝ խոսելով Սուրբ Վալենտինի տոնի մասին: Նա ասաց, որ այդ տոնի հանդեպ հետաքրքրությունը պակասում է, եւ դա եկեղեցու քարոզչության շնորհիվ է:
Aravot.am-ը հոգեւորականից հետաքրքրվեց, թե որտեղ են Սուրբ Վալենտինի տոնի ակունքները. «Իրականում այդ տոնի հիմքերն աղոտ են: Կաթոլիկ եկեղեցին Վալենտին անունով երկու սուրբ ունի, որոնց հաճախ շփոթում են: Արեւմտյան երկրներում Վալենտինի տոնը վաղուց կոմերցիոն է դարձել եւ կորցրել ակունքները: Կարեւորվում է առեւտուրը, բացիկները եւ հուշանվերները: Այդ տոնը Հայաստան է մտել եվրոպական մշակույթից՝ շարունակելով լինել կոմերցիոն»:
Տեր Եսային չի կարծում, թե այդ տոնի մեջ հոգեւոր լուրջ զգացումներ եւ ապրումներ պետք է տեսնել. «Գուցե ոչ մեկ չգիտի այդ տոնի ակունքների մասին, բայց քանի որ այն առիթ է շնորհավորելու եւ նվերներ անելու, տարածվեց նաեւ Հայաստանում: Բայց եթե ուզում ենք բարի խոսքեր ասել եւ նվերներ անել, պարտադիր չէ տոնի սպասել»:
Կարդացեք նաև
Լուիզա ՍՈՒՔԻԱՍՅԱՆ
