Տիգրան Պետրոսյանի անվան շախմատի տանն այսօր կայացած տղամարդկանց Հայաստանի առաջնության նախավերջին տուրն անպատասխան թողեց չեմպիոնության հարցը:
Երկու առաջատարներից Զավեն Անդրիասյանը միայն կես միավոր վաստակեց Մանուել Պետրոսյանի հետ պարտիայում, իսկ Ռոբերտ Հովհաննիսյանը եւ նրան ու Անդրիասյանին հետապնդող Արման Փաշիկյանը պարտություն կրեցին: Տասը տուրից հետո Զավեն Անդրիասյանը ունի 7,5 միավոր, Ռոբերտ Հովհաննիսյանը՝ 7,0, Արման Փաշիկյանը՝ 6,5: Բրոնզե մեդալի համար պայքարին միջամտել է նաեւ գրոսմայստեր Սամվել Տեր-Սահակյանը, որը կես քայլով շրջանցեց Մանուել Պետրոսյանին եւ 6,0 միավորով բարձրացավ չորրորդ հորիզոնական: Վաղը՝ վճռորոշ տուրում, Զավեն Անդրիասյանը խաղում է Նորայր Թորոսյանի, Ռոբերտ Հովհաննիսյանը՝ Հովիկ Հայրապետյանի, Արման Փաշիկյանը՝ Լեւոն Բաբուջյանի, իսկ Մանուել Պետրոսյանը՝ Սամվել Տեր-Սահակյանի հետ:
Աշոտ ՀԱԿՈԲՅԱՆ
Լուսանկարը՝ armnoc.am-ի
