Բարձրագույն որակավորման հանձնաժողովը (ԲՈՀ) կրկին հրապարակել է այս տարի չհաստատված կամ մասնագիտական խորհուրդներ կրկնակի քննարկման վերադարձված աշխատանքների ցուցակը: «Խոտանված» աշխատանքները՝ 8-ն են, 7-ը տնտեսագիտության ոլորտից, 1-ը՝ բժշկության:
Նշենք, որ վերջին 2,5 տարվա ընթացքում ԲՈՀ-ը վերադարձրել է շուրջ 200 աշխատանք, ընդ որում, դրանցում թերությունները հիմնականում բովանդակային են:
Ինչ վերաբերում է Հայաստանի Հանրապետությունում գիտության դոկտորի եւ գիտության թեկնածուի գիտական աստիճանի վկայագիր ստացածների թվաքանակին, 2015-ին պատկերն այսպիսին է՝ 593-ից 555-ը գիտությունների թեկնածու է եւ 38 դոկտոր՝ բոլոր բնագավառներում միասին վերցրած: Ընդ որում, գիտական աստիճանների առումով ռեկորդակիրը տնտեսագիտության ոլորտն է՝ 93 գիտությունների թեկնածու եւ 5 գիտությունների դոկտոր: Գիտական աստիճանի վկայագիր ստացած լինելու առումով հաջորդ բեղուն ոլորտը բանասիրությունն է՝ 74 թեկնածու եւ 3 դոկտորով, երրորդ տեղում ֆիզիկամաթեմատիկական բնագավառն է՝ համապատասխանաբար 35 եւ 5 արդյունքներով:
Գոհար ՀԱԿՈԲՅԱՆ
