«Loft» ինքնազարգացման եւ ժամանցի կենտրոնում այսօր հյուրընկալվել էր իտալացի աշխարհահռչակ ակորդեոնահար, բանդոնեոնահար Մարիո Ստեֆանո Պիետրոդարկին: Նա Երևանում է՝ Հայաստանի պետական երիտասարդական նվագախմբի 10-ամյակին նվիրված համերգաշարին մասնակցելու նպատակով: «Վաղը տեղի կունենա իմ մենահամերգը, կներեք, որ շատ ժպտերես չեմ, քանի որ հոգնած եմ»,-անկեղծացավ Պիետրոդարկին:
Aravot.am-ը ներկայացվում է դրվագներ՝ նրա եւ ներկաների երկխոսությունից.
Կարդացեք նաև
-Առաջի՞ն անգամ եք Հայաստանում:
-2007 թվականից տարին մոտ երկու անգամ գալիս եմ Հայաստան: Առաջին անգամ եկել եմ Տոնինո Գուերայի հետ: Շատ շնորհակալ եմ նրան, որ նրա շնորհիվ ինձ համար հայտնաբերեցի Հայաստանը:
-Ձեզ դուր եկա՞վ մեր երկիրը (Պիետրոդարկիին հարազատ իտալերենով հարցրեց մի աղջիկ)
-Շատ է դուր է գալիս Հայաստանը: Իտալիայից հետո իմ ամենասիրելի երկիրն է: Իսկապես այդպես է: Շատ կուզենայի այնպես խոսել հայերեն, ինչպես դուք եք հիմա խոսում իտալերեն:
-Հայաստանի ո՞ր վայրերն եք հատկապես հավանել:
-Ասեմ, որ բավականին ճանաչում եմ Ձեր երկիրը, շատ եմ հավանել Նորավանքը: Հատկապես տպավորվել եմ Թբիլիսի-Երեւան ճամփորդությունից, երբ մեքենայով հասել եմ Երեւան: Ի դեպ, Վանաձոր-Ալավերդի ճանապարհին, որտեղ երեք թունելներ կան, մեկը շատ վատ վիճակում է, կարծես քարանձավ լինի: Աչքիս առաջ գիշերը բեռնատարը մնաց թունելի մեջտեղում, չկարողացավ անցնել: Ուշագրավ էր:
-Քանի որ ես էլ վանաձորցի եմ, ասեմ, որ դա միակ թունելն է, որը կառուցապատման հնարավորություն չունի, այն անընդհատ քանդվում է (ասաց ներկաներից մեկը):
-Ինչպիսի՞ տպավորություն ունեք հայ երաժիշտների մասին:
-Պարզապես հիացած եմ նրանց պատրաստվածությամբ, հատկապես Երիտասարդական նվագախմբի երաժիշտների, ովքեր հիացնում են իրենց պրոֆեսիոնալիզմով: Հետեւաբար, երաժշտական դպրոցը Հայաստանում լավն է: Խոսելով Ջիվան Գասպարյանի մասին՝ կարելի է պատկերացնել, թե ինչ մակարդակ ունի Հայաստանը, որով ներկայանում է աշխարհին:
–Ձեր հաջողության գաղտնիքը կամ կարգախոսը:
-Դա աշխատասիրությունն է: Սկզբում մտերիմներին դժվար է հավատալ, որ երաժշտությամբ հաջողություն կունենաս: Բայց երբ հասկացա, որ երաժշտությունն իմն է, օրական 12 ժամ պարապեցի: Հիմա դասավանդում եմ, աշակերտներիս նույնպես խորհուրդ եմ տալիս լինել աշխատասեր»:
Հանդիպման ավարտին Պիետրոդարկին եւս մեկ զավեշտալի դեպք հիշեց. «Ոսկե Ծիրան» կինոփառատոնի ժամանակ շատ ծիրան կերա, ջուր խմեցի եւ խնդիր ունեցա… բայց միեւնույն է շատ եմ սիրում ծիրան: Այդ հոտը Եվրոպայում չկա»: Հանդիպման մասնակիցներից մեկն էլ այսպես արձագանքեց կատարվածին. «Եթե սիրում եք ալկոհոլային խմիչքներ համտեսել, ավելի լավ է ծիրանի օղի խմեք»:
Լուիզա ՍՈՒՔԻԱՍՅԱՆ
