«Ժառանգություն» կուսակցության անդամները համակարծիք են, որ Զարուհի Փոստանջյանը Մարդու իրավունքների պաշտպանի ամենահարմար թեկնածուն է: Այս մասին այսօր Ազատության հրապարակում «Նոր Հայաստան» հանրային փրկության ճակատի կազմակերպած ասուլիս-քննարկման ժամանակ ասաց «Նոր Հայաստան»-ի քաղաքական խորհրդի անդամ, «Ժառանգություն» կուսակցության փոխնախագահ Արմեն Մարտիրոսյանը:
«Սա մեր որոշումը չէ, այլ մոտեցումը: Վերջնականը պետք է որոշի Զարուհի Փոստանջյանը: Մենք նրան ամեն ինչով կաջակցենք, եթե նման ցանկություն հայտնի: Կարծում եմ, որ Զարուհի Փոստանջյանը Մարդու իրավունքների պաշտպանի ինստիտուտին նոր լիցք եւ որակ կհաղորդի: Այդ ինստիտուտի գործունեությունը չափազանց կարեւոր է»,-հավելեց Մարտիրոսյանը:
Նա անդրադարձավ նաեւ օրերս ԵԽԽՎ-ում քվեարկության դրված հակահայկական զեկույցներին՝ ասելով. «Ստրասբուրգում հերթական դիվանագիտական պարտությունն ունեցանք: ԵԽԽՎ-ում ընդունված հակահայկական բանաձեւն իսկապես աննախադեպ է իր բառակազմով: Երբեւէ Հայաստանը որպես «ագրեսոր» չէր որակվել, երբեւէ նման կոշտ գնահատականներ չէին տրվել: Մենք պարտվեցինք:
Նման բանաձեւի ընդունումը պատահական չէ: Սա խոսում է այն մասին, որ այն քաղաքականությունը, որը Սերժ Սարգսյանն իրականացրեց 2013թ-ի սեպտեմբերի 3-ին եւ դրանից հետո, հանգեցրեց նրան, որ Հայաստանն այլեւս «իզգոյ» երկրների շարքում է»:
Կարդացեք նաև
Լուիզա ՍՈՒՔԻԱՍՅԱՆ
