Ինչպես ավելի վաղ հայտնել էինք, այսօր «Հայաստանի հելիոֆիկացիայի ծրագրի» հեղինակ Վահան Համազասպյանը լրագրողներին ներկայացրեց ծրագրի շրջանակում մշակած նոր նախագիծ, համաձայն որի՝ մի խումբ հայ գիտնականներ նախատեսում են Իրանի հետ համատեղ ստեղծել արեւային տեխնոլոգիաներով աշխատող գյուղմթերք վերամշակող գործարաններ եւ այդ մթերքն արտահանել Ռուսաստան ու եվրոպական երկրներ:
Տեխնոլոգ, գործարար Ռուդոլֆ Հունանյանը ներկայացրեց արեւային տեխնոլոգիաներով վերամշակված գյուղմթերքի առավելությունները՝ ասելով, որ դրա ինքնարժեքը ցածր է, իսկ վաճառքի գինը՝ անհամեմատ բարձր: Նա 1998թ.-ից մասնակցել է միջազգային ցուցահանդեսների՝ Ռուսաստանում, Ֆրանսիայում, ԱՄՆ-ում, Գերմանիայում, Իտալիայում, Նիդերլանդներում եւ ներկայացրել արեւային տեխնոլոգիաներով վերամշակված՝ էկոլոգիապես մաքուր գյուղմթերք. «Այդ ապրանքներն արժանացել են միջազգային մրցանակների: Ցուցահանդեսներից մեկում ծիրան էր ներկայացված: Հավատացեք, որ եվրոպացին մեկ ծիրանի համար պատրաստ էր երկու եվրո վճարել… ոչ թե մեկ կիլոգրամի, այլ մեկ հատի: Սուտ է, որ ասում են, թե եվրոպացիները ժլատ են: Լավ ապրանքը միշտ էր գնվում է»:
Հունանյանը ցույց տվեց արեւային տեխնոլոգիայով ստեղծված ծիրանի ջեմի լուսանկարը՝ ասելով, որ համը պարզապես խոսքերով նկարագրել հնարավոր չէ. «Բա տեսեք՝ ինչ ոսկեգույն է: Տարայի մեջ համասեռ զանգված է, ջեմի տակի հատվածը չի սեւանում, լրիվ այլ որակի ջեմ է»: Բանախոսը ներկայացրեց նաեւ նույն տեխնոլոգիայով մշակված սուջուխ, որը եւս մեծ արձագանք է գտել միջազգային ցուցահանդեսներում. «Այս սուջուխի մեկ կիլոգրամը 60-90 եվրոյով է վաճառվում: Երեւանից ուրախությամբ 20 եվրոյով կոնտեյներներով կտանեն: Դե պատկերացրեք՝ 20 տոննայանոց կոնտեյները կարժենա 400 հազար եվրո: Դե թող գյուղմթերք արտադրողներն ինձ ասեն՝որ մեկ եվրոյով խնդրում են մուրաբան գնել, իրենց շահույթը ո՞րն է»:
Կարդացեք նաև
Լուիզա ՍՈՒՔԻԱՍՅԱՆ
