Այսօր Ծաղկաձորի երիտասարդական կենտրոնում կայացավ Հայաստանի երիտասարդական հիմնադրամի կողմից 2015 թվականին մարզական բարձր արդյունքներ ցույց տված ուսանող մարզիկների խրախուսման արարողությունը:
Պարգեւատրությունը կատարեց ՀԵՀ նախագահ Կարեն Ավագյանը: Բուն արարողությունից առաջ նա նշեց, որ ՀԵՀ-ը ցանկացած երիտասարդական նախաձեռնության կողքին է եւ շատ ավելի լավ է լինում, երբ այդ աշխատանքները գնահատում են իրենք՝ երիտասարդները: «Մենք ամեն բան անում ենք, որպեսզի մեր երիտասարդությունը, ուսանողությունը իր խնդիրները լուծի: Դա կլինի ուսանողական վարձեր, կրթաթոշակներ, սոցիալական բազմաբնույթ ծրագրեր, այդ թվում նաեւ՝ մարզական ցանկացած նախաձեռնություն, որը պատրաստ ենք քննարկել եւ կյանքի կոչել: Մենք սերտ համագործակցում ենք ԿԳՆ եւ ուսանողական մարզական ֆեդերացիայի հետ եւ իրականացնում բազմաթիվ ծրագրեր թե սպորտում, թե մշակույթում, թե կրթության եւ գիտության շրջանակներում: Ուզում եմ մի հորդոր անել: Չգիտեմ, թե որքան ճիշտ կընկալվի: Այն էմոցիաների մասին, որ ստանում ենք համատեղ ծրագրերն իրականացնելու արդյունքում, ուզում եմ՝ մի քիչ ավելի շատ խոսվի: Ստացվում է, որ մենք մասնակցում ենք տարբեր միջոցառումների, համատեղ ծրագրերի իրականացմանը, բայց, չգիտես ինչի, ինֆորմացիա շատ չենք տալիս: Պետությունը հնարավոր ամեն ինչ անում է, որպեսզի ուսանողության խնդիրները մեղմված լինեն: Չեմ ասում, որ ամեն օր շնորհակալություն ասենք, բայց ճիշտը համապատասխան գնահատականի արժանացնելն է: Ծախսվում է մեծ ռեսուրս: Սա հստակ ծրագիր է, որ մշակել է պետությունը եւ դա իրականացնում է ՀԵՀ-ի միջոցով: Որպես կանոն, վատ բաները արագ են տարածվում, իսկ լավ բաները, բոլորս ենք մտածում, որ այդպես էլ պետք է լիներ: Ես վստահեցնում եմ ձեզ, որ ինչ ռեսուրս էլ պետք լինի, հատկապես ուսանողական սպորտը զարգացնելու համար, մենք ոչ մի բան չենք խնայելու», – ասաց ՀԵՀ նախագահը:
Աշոտ ՀԱԿՈԲՅԱՆ
Կարդացեք նաև
