«ՀԱԼԷՊ» հայրենակցական բարեսիրական հասարակական կազմակերպության նորաբաց կենտրոնում այսօր տեղի ունեցավ «Արևիկ-Հայաստան» մտավոր և ֆիզիկական հաշմանդամություն ունեցող սիրիահայ անձանց կենտրոնի հանդիսավոր բացումը:
«Արևիկ-Հայաստան» կենտրոնի համալրումն անհրաժեշտ գույքով, սարքավորումներով, ինչպես նաև կենտրոնում համարժեք հարմարությունների ստեղծումը, պայմանների բարելավումը հնարավոր է դարձել Հայաստանում ԱՄՆ դեսպանության աջակցությամբ՝ «Ավելի լավ պայմաններ հաշմանդամություն ունեցող սիրիահայերի համար» ծրագրի շնորհիվ, որը մեկնարկել է 2015 թ. նոյեմբերին և ավարտվել 2016-ի հունվարի 31-ին:
Ծրագրի նպատակն էր հաշմանդամություն ունեցող բոլոր անձանց հնարավորություն ընձեռել օգտվելու համարժեք հարմարություններից ու համապատասխան օժանդակությունից, ստանալ հատուկ խնամք, ֆիզիկական և մտավոր զարգացման համար անհրաժեշտ կրթություն:
Կարդացեք նաև
«ՄԱԿ-ի փախստականների հարցերով գլխավոր հանձնակատարի ներկայացրած տվյալները ցույց են տալիս, որ տեղահան եղած մարդկանց թիվը վերջին տարիներին կրկնապատկվել է: Դա մեծապես պայմանավորված է Սիրիայում տեղի ունեցող ողբերգական իրադարձություններով: Բայց այդ մութ, դժվար պահերի հետ միասին եղել են նաև լուսավոր պահեր: Դրանցից մեկը թերևս այն էր, որ Հայաստանն առանձին գրկաբացությամբ ընդունեց այդքան մեծ թվով սիրիացի փախստականների»,- ասաց ՀՀ-ում ԱՄՆ արտակարգ և լիազոր դեսպան Ռիչարդ Միլսը, որը նույնպես ներկա էր «Արևիկ-Հայաստան» կենտրոնի հանդիսավոր բացմանը:
«Սիրիական համայնքը սիրիական ճգնաժամի պատճառով գնալով նվաղեց: Այն հզոր, ուժեղ, հայաշունչ համայնքը քչացավ: Ես շնորհակալ եմ բոլոր նրանց, որոնք որոշեցին գալ Հայաստան և իրենց ներկայությամբ գեղեցկացնել հայրենիքը: Սիրիահայերը եկան Հայաստան՝ իրենց հետ բերելով աշխատանքի նկատմամբ նոր վերաբերմունք, նոր մշակույթ, նոր կենցաղավարություն: Ավելի համեստ, ավելի բարի, ավելի կազմակերպված հայեր ես աշխարհում չեմ տեսել»,- նշեց ՀՀ սփյուռքի նախարար Հրանուշ Հակոբյանը:
Սիրանուշ ՀԱՅՐԱՊԵՏՅԱՆ
