Տավուշի մարզպետարանի քաղաքաշինության վարչության գլխավոր մասնագետ Միսաք Մելքումյանը մարզխորհրդի նիստում հայտարարեց, որ օրենքի պահանջ է՝ քաղաքային համայնքները պետք է ունենան գերեզմանոցները շահագործող կազմակերպություններ, սակայն Տավուշի մարզի քաղաքային 5 համայնքներում չկան նման կազմակերպություններ: Համաձայն օրենքի ՝պետք է լինեն գերեզմանոցների վարման մատյաններ, թե տվյալ գերեզմանոցում ինչ հերթականությամբ, ինչ տեղադրությամբ են կատարվել հուղարկավորությունները: Համայնքի ղեկավարները պետք է գերեզմանները բարեկարգ պահեն, թաղումների տեղերի հատկացումները կատարեն կանոնավոր կերպով:
Միսակ Մելքումյանը հայտնեց, որ ՀՀ քաղաքաշինության նախարարությունում կայացած քննարկումների ժամանակ նշվում է, որ գերեզմանոցների շահագործման առումով Տավուշի մարզը այլ մարզերի համեմատ վատ վիճակում է: Նա ասաց, որ համայնքապետարանները գերեզմանոցները բարեկարգ պահելու,դրանք ճիշտ շահագործելու համար պետք է ֆինանսական միջոցներ հայթայթեն համայնքային հողերի վաճառքից: Տավուշի մարզպետ Հովիկ Աբովյանը նշեց, որ կան խնդրի օբյեկտիվ պատճառներ, օրինակ, սահմանամերձ Չինարի գյուղում հնարավոր չէ հող վաճառել, որպեսզի գոյացած գումարն ուղղվի նշված նպատակին: Մարզպետի խոսքերով՝ մարզի գոնե քաղաքային համայնքները պետք է շտկեն գերեզմանոցների շահագործման վիճակը:
Ոսկան ՍԱՐԳՍՅԱՆ