Եկող տարի Հայաստանի երիտասարդ ընտրողների թիվը կավելանա 70.000 ով: Ըստ վիճակագրական ծառայության, Հայաստանում երիտասարդ ընտրողները՝ 18-24 տարեկան, կազմում են ընտրողների 340 հազարը: Այսօր Երևանում Եվրոպայի խորհրդի գրասենյակի ղեկավար Նատալյա Վուտովան ասաց, որ ամեն կերպ պետք է փորձեն խրախուսել երիտասարդներին՝ ընտրություններին մասնակցելու առումով: Այսօր պաշտոնապես մեկնարկած «Երկարաժամկետ ընտրական աջակցություն Հայաստանում ընտրությունների հետ առնչվող շահագրգիռ կողմերին» ծրագիրն էլ, ըստ նրա նաեւ դրան է ուղղված:
«Այս ծրագրի նպատակն է առաջին հերթին խրախուսել, որպեսզի ընտրություններին շատ ընտրողներ մասնակցեն: Մենք ուշադրություն ենք դարձրել հենց այս բաղադրիչին: Այս տարի 40 հազար նոր ընտրող է լինելու, այսինքն` նրանք, ովքեր առաջին անգամ են ընտրելու, 2017-ին նրանք կլինեն ավելի քան 70 հազար: Ծրագրի նպատակներից է խրախուսել նրանց ակտիվորեն մասնակցել ընտրություններին»,- ասաց Նատալյա Վուտովան:
Նա նկատեց, որ Հայաստանում կանայք ընտրական գործընթացներում քիչ են: Օրինակ կանայք կազմում են ընտրողների 54 տոկոսը: Հայաստանում 18 նախարարից միայն երեքն են կին, Երևանի քաղաքային խորհրդի 65 անդամից միայն 10 է կին, իսկ 10 մարզպետերի մեջ միայն տղամարդիկ են, չկան կանայք:
«Այս ծրագրի երկրորդ նպատակը լինելու է ավելացնել կանանց մասնակցությունն ընտրություններին և որպես ընտրողներ, և որպես թեկնածուներ»:
Կարդացեք նաև
ԵԽ գրասենյակի ղեկավարը նկատեց նաեւ, որ արդար ընտրությունների միակ պատասխանատուն իշխանությունը չէ. «Միայն իշխանությունները պատասխանատու չեն, նաև քաղաքացիական հասարակությունը: Դրա համար պետք է իշխանությունները համագործակցեն քաղհասարակության հետ, այդ կազմակերպություններին ընդունեն գործընկերներ, ոչ թե թշնամիներ: Ծրագրի նպատակն է նպաստել այդ համագործակցությանը»:
Արփինե ՍԻՄՈՆՅԱՆ
