«Մխիթար Սեբաստացի» կրթահամալիրը ՀՀ կրթության եւ գիտության նախարարության աջակցությամբ նախաձեռնել է «Հանրակրթական Դիջիթեք 2016. թվային միջոցները հանրակրթության արդյունավետ գործիքներ» ամենամյա 8-րդ ստուգատեսը, որի նպատակն է՝ հանրակրթության ոլորտում կիրառել եւ տարածել թվային միջոցներն ու տեղեկատվական տեխնոլոգիաները: Ստուգատեսի հայտերն արդեն ընդունվում են: Այս մասին Aravot.am-ին հայտնեց հանրակրթական «Դիջիթեք» ստուգատեսի համակարգող Էմմա Իսախանյանը: Նա նշեց, որ ի տարբերություն նախորդ տարիների՝ այս անգամ «Դիջիթեք»-ը համակարգում են ոչ թե կրթահամալիրի ուսուցիչները, այլ սաները. «Ստուգատեսն ունի 14 անվանակարգ, որոնք համապատասխան պահանջներ են ներկայացնում: Մասնակիցները պետք է պատրաստեն դրանց համապատասխան աշխատանք՝ տեսանյութերի եւ այլ ձեւաչափով նյութերի տեսքով: Օրինակ, անվանակարգերից մեկը կոչվում է «Դիջիթեքը՝ ընտանիքում»: Մասնակիցը պետք է ներկայացնի, թե ընտանիքում ինչպես են օգտագործվում թվային տեխնոլոգիաները՝ ֆոտոխցիկը, հեռախոսը, ձայնագրիչը եւ այլն»,-պատմեց Էմման:
Կրթահամալիրում մեկնարկել են նաեւ բնագիտատեխնիկական ստեղծագործության, հանրակրթական մարմնամարզական, «Կարդում ենք…» եւ «Մայրենի լեզու» ստուգատեսները: Փետրվարի 8-18-ը ստուգատեսների կայքերում, նաեւ mskh.am-ում առցանց կքննարկվեն սաների եւ դասավանդողների ստուգատեսային նյութերը, կրթահամալիրում կկազմակերպվեն վարպետության դասեր, ցուցադրություններ, ուսումնական նյութերի և պիտույքների տոնավաճառ։ Ձևավորված են ստուգատեսների հանձնաժողովները, որոնք կգնահատեն ներկայացված նյութերը և կընտրեն հաղթողներին։
Լուիզա ՍՈՒՔԻԱՍՅԱՆ
