Եվրախորհրդարանը (ԵԽ) փետրվարի 4-ին միաձայն բանաձև է ընդունել, որով դատապարտում է Մերձավոր Արևելքում «Իսլամական պետություն» (ԻՊ) ահաբեկչական խմբավորման զինյալների կողմից իրականացվող քրիստոնյաների, եզդիների և այլ ազգային փոքրամասնությունների նկատմամբ պարբերաբար իրականացված զանգվածային սպանությունները՝ անվանելով դրանք ցեղասպանություն:
Եվրախորհրդարանի բանաձևի 10-րդ կետը «կոչ է անում Եվրոպական միությանն ստեղծել հավատի և կրոնի ազատության հարցերով մշտական հատուկ ներկայացուցչի պաշտոն», որը կօգնի Եվրոպական միությանն առավել արդյունավետ պայքարել աշխարհում կրոնական հիմքով բռնությունների աճի դեմ:
Բանաձևը մշակվել է՝ թիրախավորելով Մերձավոր Արևելքի կրոնական փոքրամասնություններին:
«Եզդիների ազգային կոմիտե» հասարակական կազմակերպության փոխնախագահ Սաշիկ Սուլթանյանն այս բանաձևի հետ մեծ հույսեր է կապում. «Այն կարող է դրական արդյունքներ ունենալ, քանի որ վկայակոչում է ՄԱԿ-ի նախորդ զեկույցները: Բացի այդ, ոչ միայն իրավիճակն է արձանագրում, այլև ՄԱԿ-ի Անվտանգության խորհրդին կոչ է անում համապատասխան քայլեր ձեռնարկել այդ ամենին վերջ տալու համար»,- «Պոստ սկրիպտում» մամուլի ակումբում այսօր լրագրողների հետ հանդիպման ժամանակ ասաց Սաշիկ Սուլթանյանը:
Կարդացեք նաև
Նրա խոսքով՝ Եվրախորհրդարանում ընդունված իրավական ակտը Եվրոպայում կդառնա նաև այլ քննարկումների առարկա, քանի որ բանաձևը քննարկվելու է տարբեր հանձնաժողովներում, և մշակվելու է հետագա գործողությունների ծրագիր:
«Բանաձևի ընդունումը պատահական չէր: Մերձավոր Արևելքում տիրող իրավիճակը համարժեք գնահատական չէր ստացել եվրոպական համայնքի կողմից: Մարդու իրավունքները, համաշխարհային արժեք լինելուց բացի, նաև եվրոպական արժեք են: Եվ եթե Եվրոպան այդ գործողությունները չորակեր որպես ցեղասպանություն, առաջին հերթին իր գաղափարներին էր դեմ գնալու»,- ասաց Ս. Սուլթանյանը՝ ընդգծելով, որ բանաձևն ընդունվել է եվրոպական կառույցների ճնշման արդյունքում: Այդ հարցում իրենց լուման են ունեցել նաև տարբեր երկրներում բնակվող եզդիական համայնքները:
Սիրանուշ ՀԱՅՐԱՊԵՏՅԱՆ
